“Павестка 50” у Шчучыне: ад страху да актыўнай супольнасці (ФОТА)

Фота Службы інфармацыі "ЕўраБеларусі"

Для таго, каб мясцовыя павесткі працавалі, людзям з інваліднасцю неабходна быць актыўнымі ў працэсах прыняцця рашэнняў і вырашэння праблем.

У спецыяліста па сацыяльнай працы аддзялення дзённага знаходжання людзей з інваліднасцю Шчучынскага ТЦСАН Вольгі Сцефановіч 3 група інваліднасці. Дзяўчына праходзіла рэабілітацыю ў ТЦСАН і працавала старшым інспектарам па кадрах, і ў нейкі момант вырашыла змяніць дзейнасць, бо зразумела: праца з людзьмі з інваліднасцю – тое, што ёй блізка. Цяпер Вольга з цікаўнасцю ўдзельнічае ў праекце “Актыўная супольнасць”, які рэалізуецца ў Шчучыне ў рамках кампаніі “Павестка 50” па забеспячэнні правоў людзей з інваліднасцю ў рэгіёнах.

– Хочацца нешта змяніць у горадзе, зрабіць яго больш даступным. У нас людзі з інваліднасцю жывуць у сваім свеце, да таго ж многія бацькі напачатку баяцца адпускаць дзяцей да нас у аддзяленне. Але пасля яны бачаць, што дзеці ў нас “ажываюць”, пачынаюць размаўляць. Таму вельмі хочацца, каб людзі перасталі баяцца, – распавяла Вольга Службе інфармацыі “ЕўраБеларусі”.

Вольга Сцефановіч. Фота Службы інфармацыі "ЕўраБеларусі"

У Шчучынскім раёне жывуць больш за 3100 людзей з інваліднасцю, і з часам гэтая лічба павялічваецца. Пакуль што далёка не ўсе з іх гатовыя, як Вольга, займацца адвакацыяй сваіх інтарэсаў і паляпшэннем гарадскога асяроддзя. Аднак ёсць тыя, хто гатовы паспрабаваць. Бо маленькімі крокамі можна дайсці да вялікай мэты, перакананы каардынатары праекта “Актыўная супольнасць”. І дынаміка ўжо ёсць.

 – Стварэнне мясцовых павестак – гэта вельмі карысна, – гаворыць каардынатарка праекта ад Гродзенскай абласной арганізацыі Беларускага таварыства Чырвонага Крыжа Інэса Ларыёнава. – Жывучы ў буйным горадзе, немагчыма ведаць праблемы, з якімі сутыкаюцца людзі ў раёнах. Таму мне вельмі падабаецца выраз, які выкарыстоўваюць прадстаўнікі Офіса па правах людзей з інваліднасцю: “Нічога для нас без нас”.

Інэса Ларыёнава (стаіць). Фота Службы інфармацыі "ЕўраБеларусі"

Праца над стварэннем павесткі не абяцае быць лёгкай. Прааналізаваўшы сітуацыю з інваліднасцю ў Шчучынскім раёне, эксперты выявілі, што колькасць людзей з інваліднасцю павялічваецца, расце і колькасць тых, хто выкарыстоўвае дадатковыя сродкі для перамяшчэння ў прасторы. Але больш за ўсё ўразіла даследчыкаў тое, што ў сельскай мясцовасці становіцца больш людзей з інваліднасцю сярод мужчын, якія не працуюць – праўда, гэта тэма для асобных даследванняў і асобных павестак.

Да стварэння мясцовай праграмы ў Шчучыне плануюць прыцягнуць усіх зацікаўленых: прадстаўнікоў грамадскіх аб'яднанняў, адміністрацыю раённага выканаўчага камітэта, людзей з інваліднасцю і іншых. Гэты працэс патрабуе шырокага грамадскага абмеркавання, працягу вывучэння мясцовай спецыфікі і пошуку вырашэння лакальных праблем. Грамадскія арганізацыі, якія дзейнічаюць у раёне, маюць патрэбу ў экспертнай і кансультацыйнай падтрымцы для стварэння павесткі. Да таго ж у раёне актуальная праблема выключэння людзей з інваліднасцю з працэсу прыняцця рашэнняў. Усе гэтыя аспекты так ці іначай закраналіся падчас аднаго з мерапрыемстваў праекта – двухдзённага трэнінга па адвакатаванні і самадапамозе “Школа лідара”.

Падчас "Школы лідара". Фота Службы інфармацыі "ЕўраБеларусі" 

Падчас "Школы лідара". Фота Службы інфармацыі "ЕўраБеларусі" 

Падчас "Школы лідара". Фота Службы інфармацыі "ЕўраБеларусі" 

Падчас "Школы лідара". Фота Службы інфармацыі "ЕўраБеларусі" 

Па словах загадчыцы аддзялення дзённага знаходжання для сталых грамадзян ТЦСАН Шчучынскага раёна Анжаліны Шпакоўскай, распрацоўка лакальнай праграмы ўжо пачалася.

– Мы вельмі актыўна працуем у напрамку стварэння мясцовай павесткі, выязджаем на ўсе семінары, збіраем матэрыял, які цяпер трэба апрацаваць. У гэтым вельмі зацікаўлены і мясцовыя ўлады, якія заўжды знаходзяць час на ўдзел у сустрэчах, прысвечаных кампаніі “Павестка 50”,  – распавяла Анжаліна Шпакоўская.

Падчас працы выяўлены найбольш вострыя праблемы, якія ёсць у раёне: і без таго частковае безбар’ернае асяроддзе не заўсёды адпавядае ўстаноўленым стандартам, няма карты гарадскіх маршрутаў для людзей, якія перамяшчаюцца ў інвалідных вазках, цяжкасці працаўладкавання людзей з інваліднасцю… Усе гэтыя пытанні з’яўляюцца часткай мясцовай павесткі.

– Але адна з асноўных праблем – нізкая актыўнасць людзей з інваліднасцю. Менавіта таму ў трэнінгу ў “Школе лідара” 98% удзельнікаў былі асобамі з асаблівасцямі. Іх актыўнасць вельмі важная для таго, каб павестка спрацавала. Але гэта праца не аднаго года, – сказала Анжаліна Шпакоўская.

Анжаліна Шпакоўская. Фота Службы інфармацыі "ЕўраБеларусі" 

***

Матэрыял падрыхтаваны ў межах міжнароднага праекта “Правы людзей з інваліднасцю: парадак дня для Беларусі (Павестка 50)”.

Кампанія “Павестка 50” рэалізуецца пры падтрымцы Еўрапейскага Звязу ў партнёрстве з Fundacja TUS (Польшча) і грамадскай арганізацыяй “Еўрапейскі дом” (Данія). У Рэалізацыі кампаніі ў Беларусі ўдзельнічаюць Офіс па правах людзей з інваліднасцю, Міжнародны кансорцыюм “ЕўраБеларусь” і Цэнтр еўрапейскай трансфармацыі.