28 красавіка ў Мінску — дыскусія "Культурная спадчына і сучаснасць: фармаванне новай суб’ектнасці?"

Карціна Францішка Смуглевіча "Смерць Хадкевіча" (Хоцін, 1621)

28 красавіка 2017 года ў мінскай крэатыўнай прасторы "ЦЭХ" адбудзецца адкрытая дыскусія на тэму: "Культурная спадчына і сучаснасць: фармаванне новай суб’ектнасці?".

Дыскусія арганізуецца ў межах праграмы CHOICE: Cultural Heritage — Opportunity for Civic Engagement, які фінансуецца і рээалізуецца ва Украіне, Беларусі, Арменіі, Малдове пры падтрымцы Еўрапейскага Саюза. Асноўны змест, які прапануецца да абмеркавання, — напрацоўкі і рэкамендацыі па працы ў сектары гісторыка-культурнай спадчыны, зробленыя цягам амаль двух год разгортвання праграмы CHOICE.

Праграма CHOICE разглядае культурную спадчыну як рэсурс для развіцця мясцовых суполак, умацаванне сучаснай беларускай ідэнтычнасці і еўрапейскага цывілізацыйнага выбару Беларусі. Удзел у ёй бяруць 10 праектаў, прысвечаных як матэрыяльнай, так і нематэрыяльнай гісторыка-культурнай спадчыне. Завяршыцца праект у чэрвені бягучага года.

Першая з дзвюх запланаваных дыскусій ад CHOICE-Беларусь будзе прысвечаная асаблівасцям беларускага кантэксту працы з гісторыка-культурнай спадчынай, асноўным фактарам і выклікам, з якімі сутыкаюцца адмыслоўцы штодзень. Асобная ўвага будзе нададзеная магчымасцям фармавання новай, грамадзянскай суб’ектнасці ў вырашэнні супольных прафесійных пытанняў аховы і інтэрпрэтацыі нашай спадчыны.

У размове прымуць удзел эксперты:

• Андрэй Ягораў, дырэктар Цэнтра еўрапейскай трансфармацыі, палітолаг, метадолаг;
• Ігар Раханскі, рэстаўратар, кіраўнік праектнага бюро Беларускага камітэта ICOMOS;
• Уладзімір Мацкеквіч, філосаф і метадолог, грамадскі дзеяч;
• Сцяпан Стурэйка, культурніцкі антраполаг, выкладчык, даследчык;
• Ігар Чарняўскі, экс-загадчык Упраўлення па ахове гісторыка-культурнай спадчыны Міністэрства культуры Рэспублікі Беларусь;
• Антон Астаповіч, старшыня Грамадскага аб’яднання "Беларускае добраахвотнае таварыства аховы помнікаў гісторыі і культуры".

Дыскусія "Культурная спадчына і сучаснасць: фармаванне новай суб’ектнасці?" адбудзецца 28 красавіка, у пятніцу, у крэатыўнай прасторы "ЦЭХ" (Мінск, вул. Кастрычніцкая, 16, 2-гі паверх). Пачатак у 19.00 (пачатак рэгістрацыі — у 18.30).

Далучайцеся! Удзел у мерапрыемстве магчымы па папярэдняй рэгістрацыі ў тэрмін да 12.00 27 красавіка 2017 года.

Сачыце за мерапрыемствам у Фэйсбуку.

UPD.: Гл. відэазапіс анлайн-трансляцыі: