Вольскі, Глобус і Акудовіч прэзентавалі дзіцячую кнігу пра мастацтва (ФОТА)

Фота Службы інфармацыі "ЕўраБеларусі"

Выданне прысвечана сямі беларускім мастакам ад Малевіча і Шагала да Цэслера і Вашкевіча і складаецца з ілюстрацый, біяграфій, казак, вершаў і гульняў.

Дзіцячая кніга “Беларускае мастацтва ХХ стагоддзя. Віцебская школа” – унікальная, нічога падобнага ў Беларусі яшчэ не выдавалі. Па-першае, яна напісаная не “савецкай” павучальнай мовай, а прапануе сваім маленькім чытачам спазнаваць роднае мастацтва ў форме гульні. Па-другое, казкі для выдання сачынялі Адам Глобус, Лявон Вольскі, Валянцін Акудовіч, Андрэй Хадановіч, Ганна Кісліцына. Аўтары праекта – каманда “Дзіцячых творчых майстэрняў” галерэі "Ў". Выдаць кніжку сталася магчымым пры дапамозе краўдфандынгу, а таксама пры падтрымцы праекта CHOICE: Cultural Heritage - Opportunityy for Civic Engagement. 

“Мы шмат вандравалі і заўсёды здзіўляліся, чаму ў галерэях і музеях усяго свету так шмат дзіцячай літаратуры пра лакальнае мастацтва. Гэтыя кнігі маляўнічыя, цікавыя, іх хочацца гартаць, маляваць выконваць розныя заданні. А пра беларускае мастацтва нічога такога не было. І мы падумалі, што трэба ўзяць справу ў свае рукі. Нічога звышнатуральнага мы не зрабілі, але для Беларусі гэта пэўны крок у бок спазнання ўласнага мастацтва”, – распавяла PR-мэнэджар праекту Вольга Мжэльская.

На прэзентацыю прыйшлі самыя розныя аматары мастацтва.

Пра запатрабаванасць такой кніжкі сведаць лічбы: толькі па папярэдняй замове праз ахвяраванні на краўдфандынгу выдалі 400 асобнікаў. Тыя ж, хто не паспеў замовіць кнігу, могуць набыць яе ў кнігарні “ЛогвінаЎ”.

Куратарка выдання Сафія Садоўская зазначыла, што кніга – гэта частка цэлага праекту, які ўключаў у сябе заняткі для дзяцей.

“У аснове кнігі – мастацтва, гульня, творчасць, свабода і размова. Школьныя сістэмы амаль не працуюць з нашай культурай. І гэта праблема: дзеці не ведаюць гісторыю нашага мастацтва. Мы спрабуем распавесці пра наша і сусветнае мастацтва на занятках, мы даследуем яго праз дыялог, творчасць і гульню. Мы спрабуем быць не настаўнікамі, а саўдзельнікамі працэсу і такімі ж даследчыкамі, як дзеці.

Кніга для дзяцей – не тое ж самае, шт кніга для дарослых. Калі мы возьмем дзіцячую кнігу пра мастацтва савецкага часу, яна будзе пачынацца са словаў “Дарагі сябра!”, а потым простымі словамі будзе пераказвацца тое, што напісана ў кнігах для дарослых. Мне здаецца, гэта няслушны метад. Дзеці – гэта не “недадарослыя”, яны іншыя. Дзіцячая мова – гэта іншая мова, мова гульняў, казак, вершаў”.

Аб запатрабаванасці выдання сведчыла паўнюткая зала гасцей.

Апроч выдання кніжкі, аўтары праекту правялі курс пра мастацтва Беларусі ХХ стагоддзя – гэта была творчая лабараторыя, дзе дзеці даследвалі працы мастакоў. Цяпер рыхтуецца тэматычны дапаможнік, які можна будзе выкарыстоўваць бацькам і адукатарам.

Галоўны рэдактар кнігі і аўтар казак Адам Глобус распавёў, што наступная дзіцячая кніжка будзе прысвечана выключна Казіміру Малевічу.

Адам Глобус падпісвае кнігу.

“Кожны праект цікавы, калі ёсць перспектыва. Мы працуем для дзяцей, каб была перспектыва: нашы дзеці будуць вырастаць, а мы будзем рабіць новыя кніжкі”, – зазначыў ён.

Яшчэ адзін аўтар казак – філосаф, эсэіст Валянцін Акудовіч.

“У траўні 1975 года, пасля вандроўкі па Карпатах, я вырашыў, што, вярнуўшыся ў горад, не буду галіцца. Хутка 45 год маёй барадзе, мне здаецца, што я нарадзіўся з ёй. Я прызвычаіўся і да барады, і да мянушкі “дзед”. Але 10 месяцаў назад я стаў сапраўдным дзедам, у мяне нарадзіўся ўнук! І прыкладна ў той самы час арганізатары праекта і персанальна Глобус кажуць, што трэба напісаць казкі пра мастакоў. Я ў жыцці не пісаў казак. Але ж я ўжо сапраўдны дзед, і калісьці мне трэба будзе чытаць унуку казкі. І так я паспрабаваў”.

Валянцін Акудовіч падчас аўтограф-сесіі.

Яшчэ адзін аўтар кнігі Лявон Вольскі не стаў казаць доўгіх прамоў, затое адыграў невялікі душэўны канцэрт. Слухачы віталі Лявона як сапраўдную легенду – стоячы, і доўга не адпускалі, таму музыка зайграў яшчэ некалькі песень звыш праграмы.

Выступ Лявона Вольскага.

Напрыканцы імпрэзы адбылася аўтограф-сесія з аўтарамі выдання.

Даведка “ЕўраБеларусі”: 

Міжнародны праэкт "CHOICE — Cultural Heritage: Opportunity for Improving Civic Engagement" рэалізуецца Асацыяцыяй агенцтв мясцовай дэмакратыi ALDA (Францыя) сумесна з Міжнародным кансорцыумам "ЕўраБеларусь" (Лiтва).

Праект разгортваецца ў Беларусі, Украіне, Малдове і Арменіі ў межах праграмы ЕС "Усходняе партнёрства" пры iнфармацыйнай і кансультацыйнай падтрымцы арганiзацый-партнёраў:

Цэнтра культурнага менеджменту (Львоў, Украіна);

Нацыянальнага камітэта ICOM (Кішынёў, Малдова);

Адукацыйна-даследчага фонда Millennium (Ерэван, Арменiя);

Грамадскага аб’яднання "Цэнтр сацыяльных інавацый" (Мінск, Беларусь).

Беларуская частка праекта — "CHOICE-Беларусь: спадчына i сучаснасць" — грунтуецца на каштоўнасці культурнай спадчыны як рэсурсу для ўмацавання і развіцця сучаснай беларускай ідэнтычнасці і еўрапейскага цывілізацыйнага выбару Беларусі. Арганiзатары праекта маюць мэтай надаць імпульс пашырэнню разнастайнасці інавацыйных падыходаў і ініцыятыў па ўвядзенні культурнай спадчыны Беларусі ў сучаснае культурнае жыццё беларускага грамадства.