30 траўня ў Мінску — прэзентацыя кнігі Міхала Анемпадыстава "Колер Беларусі"

У перадапошні дзень вясны адбудзецца доўгачаканая прэзентацыя кнігі мастака і дызайнера Міхала Анемпадыстава "Колер Беларусі".

З даследваннем "Колер Беларусі" ў фармаце выставы і займальных лекцый цікаўныя да беларускай культуры знаёмыя даўно. Цяпер шматгадовая даследчыцкая праца Міхала Анемпадыстава ўвасобілася ў кнігу — шыкоўны дызайнерскі альбом.

"Візуальны матэрыялы кожнага з раздзелаў: "Белы", "Чорны", "Чырвоны", "Сіні. Блакітны", "Шэры", "Залаты. Жоўты", "Зялёны" суправаджаюць разгорнутыя аўтарскія тэксты. Гэта экскурсы ў культуралогію колераў. Кожны колер прадстае як прадукт культуры, для якога на пэўным этапе гісторыі з’яўляецца адпаведная назва, увасабляючы ягоны знакавы сэнс, сімвалічную інфармацыю, маркёрныя функцыі", — распавядае доктар мастацтвазнаўства, дацэнт катэдры этнаграфіі і фальклору БДУКМ Вольга Лабачэўская, рэцэнзент гэтай даследчыцкай працы.

Філосаф, літаратар і рэдактар кнігі Валянцін Акудовіч азначае яе так: "Калі б мяне папрасілі адным словам ахарактарызаваць кнігу Міхала, дык гэтым словам было б: "Патрэбная". Мне яна бачыцца надзвычай патрэбнай кнігай для ўсіх, хто хоча заглыбіцца ў самую сутву Беларусі праз гісторыю яе колераў. І я пэўны, што бальшыня чытачоў адкрые для сябе новы свет, пра існаванне якога нават не здагадвалася, нягледзячы на ўсе свае ўніверсітэты".

Лятучы ўніверсітэт запрашае ўсіх зацікаўленых 30 траўня, у аўторак, у Галерэю Беларускага саюза дызайнераў (Мінск, вул. Брылеўская, 14, уваход са двара). Пачатак імпрэзы ў 19.30. Уваход вольны!

Кніга Міхала Анемпадыстава "Колер Беларусі" выдадзеная ў межах Міжнароднага праекта па развіцці культурнай спадчыны CHOICE.

Па дадатовую інфармацыю звяртайцеся па нумарах тэлефона: (+375 29) 7422040 (Юлія), (+375 44) 7424832 (Лізавета).

Сачыце таксама за мерапрыемствам у Фэйсбуку.