Анатоль Івашчанка: Комікс “Пра Кастуся” сканчаецца перамогай
Унікальны комікс “Пра Кастуся”, прысвечаны падзеям паўстання 1863-64 гадоў, нарэшце выйшаў з друку.
Падрыхтоўка комікса адбывалася ў межах кампаніі “1863”, якая ажыцыяўляецца пры падтрымцы Міжнароднага кансорцыюму “ЕўраБеларусь”.
Як распавёў куратар выдання комікса “Пра Кастуся”, паэт Анатоль Івашчанка, ідэя адзначыць 150-ю гадавіну паўстання такім незвычайным прадуктам нарадзілася калегіяльна ў Саюзе беларускіх пісьменнікаў.
“А рэалізацыю гэтай ідэі даверылі мне. Прызнаюся, што мне заўсёды вельмі падабалася п’еса Уладзіміра Караткевіча "Кастусь Каліноўскі: смерць i неўміручасць". Першапачатковы варыянт назвы гэтай п’есы быў “Руна пра Кастуся”. Але слова “руны” нам не вельмі спадабалася. Калі мы стваралі комікс, не ведалі, як яго назваць. І вырашылі пакінуць проста два словы “Пра Кастуся”. Бо амаль кожны адразу ж зразумее, які менавіта Кастусь маецца на ўвазе”, –заўважыў Анатоль Івашчанка.
“Чаму Караткевіч? Нават адразу цяжка патлумачыць. Па-першае, сёлета спаўняецца 50 год з часу напісання гэтай п’есы. Я лічу, што яна цудоўна клалася пад комікс. Бо, хоць Караткевіч і лічыў, што ён не ствараў спрошчаных вобразаў Каліноўскага, Мураўёва ды іншых гістарычных персанажаў, але ў яго атрымалася вельмі лаканічна ўкласці ў вусны герояў іхнія асноўныя ідэі, –лічыць куратар выдання. – Гэтая п’еса напоўненая і трагізмам, і сапраўдным караткевіцкім гумарам. Таму наша задача была ў тым, каб па магчымасці скараціць і так вельмі лаканічны тэкст п’есы да памераў комікса. Думаю, у нас гэта атрымалася”.
Адметны комікс са шчаслівым, а не рэальным фіналам
Анатоль Івашчанка прызнаўся, што ў падтрыхтоўцы комікса найбольшая нагрузка кладзецца на мастака: “У якасці арганізатара мастацкай часткі мы запрасілі Уладзіміра Дрындрожыка – мастака, дызайнера, паэта, музыку, які раней коміксы не ствараў. Насамрэч, апошні комікс, які выходзіў па-беларуску, ствараў Уладзімір Адамчык (Адам Глобус) яшчэ на пачатку 90-х гадоў. І такіх паўнавартасных беларускіх коміксаў прынамсі на паперы доўгі час не было. На маю думку, Уладзімір Дырндрожык выдатна справіўся са сваёй задачай. Ён стварыў вельмі адметны комікс. І нават шкада, што некаторыя ягоныя працы ў выданні выглядаюць маленькімі па памеры, у той самы час, як чалавек маляваў вялізную батальную сцэну”.
На думку Анатоля Івашчанкі, выданне комікса “Пра Кастуся” павінна мець свой працяг. “Лічу, што першы блін у нас выйшаў не комам. Пэўных ідэй пакуль няма. Але нават вось гэты комікс з 26 старонак фармату А4 патрабуе працягу. Ён сканчаецца шматкроп’ем. Прычым сюжэт не сканчаецца паразай Каліноўскага (гэта была такя прынцыповая задача ад пачатку – не завяршыць усё павешаннем на Лукішках). У прынцыпе, комікс сканчаецца перамогай, што гістарычна не можа быць рэальным фіналам”, – распавёў ён.
Тэматыка паўстання патрабуе пафасу
Не выключана, што асоба Кастуся Каліноўскага будзе раскрыта і ў іншых незвычайных жанрах. “Я чуў пра вельмі сімпатычную ідэю, як стварэнне мюзікла “Пра Кастуся”. Не ведаю, хто яе рэалізоўвае і на якім усё зараз этапе. Але вельмі не хацелася б, каб гэта засталося толькі ідэяй”, – пажадаў Анатоль Івашчанка.
На ягоную думку мюзікл і комікс – блізкія жанры. “Гэта такія жанры, у якіх дазваляецца (і нават вітаецца) пафас. А пафас – гэта такая рэч, з якой трэба вельмі асцярожна абыходзіцца. І калі для рок-оперы пафаснасць з’яўляецца нейкай галоўнай рысай, то, натуральна, што ў нейкім звычайным празаічным творы пафаснасці не мусіць быць шмат. І мне як раз падабаюцца такія пафасны жанры. Бо ў кантэксце праблематыкі паўстання яны пасуюць найбольш. Асабіста я не гатовы ствараць рок-оперу ці мюзікл, хаця нейкім чынам паўдзельнічаць было б вельмі цікава”, – прызнаўся Антоль Івашчанка.
-
17.01
-
13.12
-
17.11
-
07.10
-
30.09
-
22.09
-
Владимир Мацкевич: Политтехнологии третьего поколения — 5-й доклад -
Владимир Мацкевич: Политтехнологии третьего поколения — 4-й доклад -
Владимир Мацкевич: Политтехнологии третьего поколения — 3-й доклад -
Владимир Мацкевич: Политтехнологии третьего поколения — 2-й доклад -
Владимир Мацкевич: Политтехнологии третьего поколения — 1-й доклад -
Елена ВЕРЕЩАГИНА. О пользе странных телепрограмм -
Светлана Алексиевич. Примитивно страшный мир -
Павел БЕЛАВУС: Не быць абыякавымі
