Гурт “Палац” адзначыў свой 20-гадовы юбілей канцэртам

Акции / Фото

“Палац” меў намер зрабіць не проста канцэрт, а сапраўднае свята. І гэта бліскуча атрымалася. Як і было пазначана ў афішы, на імпрэзе прагучалі “лепшыя песні любові і мудрасці” “Палаца”. Сапраўды, тут былі як добра вядомыя слухачам кампазіцыі, так і тыя, што граюцца не так часта.

Лідар гурта Алег Хаменка часам рабіў кароткі экскурс у гісторыю той ці іншай песні. Распавёў пра тое, што месяц “не свеціць, а лунае”, пра тое, як маці ў вёсцы пускала дадому сына, што загуляў да ночы, толькі пасля ўзыходу сонца. Сказаў, што, магчыма, будзе зладжаны адмысловы канцэрт на Каляды. Сярод іншых прагучала новая песня “Кола грукатала”, якая дала назву апошняму альбому калектыва.

Пасля музыкі перайшлі ў акустычны рэжым і выканалі некалькі песень у такім нібыта хатнім, інтымным гучанні.
Алег Хаменка ўзгадаў тых, хто ў свой час быў звязаны з “Палацам”, але зараз ідзе сваім уласным музычным шляхам – Змітра Вайцюшкевіча, Вераніку Круглову, якія ў сілу абставінаў не змаглі прысутнічаць на юбілейным канцэрце.

Павіншаваць “палацаўцаў” прыйшлі іх сябры - Аляксандра і Канстанцін, Ігар Варашкевіч (“Крама”), Юры Несцярэнка (“White Night Blues”), Алесь Камоцкі, Наста Шпакоўская (Naka). Адны проста казалі цеплыя словы, а іншыя дарылі музычныя падарункі – песні ва ўласным выкананні.

Вярнуўшыся на сцэну пасля выступаў сяброў, “палацаўцы” набралі імпэту і, як то кажуць, літаральна жглі, а слухачы ўжо не маглі ўсядзець на месяцах і танчылі.