Канцэрт "Палаца" ўсё ж такі адбудзецца

Адміністрацыя Тэатру беларускай драматургіі вырашыла правесці мерапрыемства насуперак ранейшым настойлівым парадам не рабіць гэтага. Алег Хаменка з музыкантамі выступіць з вялікай праграмай.

Канцэрт «Палацу», запланаваны 26 кастрычніка, усё ж адбудзецца, нягледзячы на распаўсюджаную раней інфармацыю аб яго адмене. Як стала вядома парталу Tuzin.fm, такое рашэнне прыняла адміністрацыя Тэатру беларускай драматургіі, дзе планавалася правядзенне канцэрту. Адпаведная абвестка з выбачэннямі перад гледачамі з нагоды адмены мерапрыемства была знята з сайту тэатру.

Як паведаміў лідэр гурта «Палац» Алег Хаменка, кіраўніцтва тэатру абвергнула імі ж распаўсюджаную інфармацыю і пацвердзіла факт правядзення канцэрту. Квіткі ізноў можна набыць у касах тэатру. Па неафіцыйнай інфармацыі, за «Палац» уступіўся міністар культуры Беларусі Павал Латушка. Менавіта Мінкульту непасрэдна падначальваецца тэатр. Адмена ж канцэрту была ініцыявана зусім іншай структурай.