Кінуты ў псіхіятрычны шпіталь лекар з Віцебску абвесціў галадоўку

Віцебскі актывіст Сяргей Рыжоў распавёў Радыё Свабода новыя падрабязнасці справы накіраванага на прымусовае псіхіятрычнае лячэнне лекара Ігара Пастнова.

21 жніўня суд Віцебскага раёну вырашаў, ці пакінуць Ігара Пастнова ў Віцебскім абласным псіхіятрычным шпіталі на прымусовае лекаванне. У сакратарыяце Віцебскага раённага суду пацьвердзілі, што разгляд справы Ігара Пастнова адбыўся, але паведаміць пра вынік разгляду адмовіліся.

Паводле інфармацыі Сяргея Рыжова, суддзя Таццяна Дзегцярова пастанавіла накіраваць Пастнова на прымусовае лячэнне:

"У лекара Пастнова ёсць 10 дзён, каб напісаць касацыйную скаргу. Сёння ў 9 гадзін пад час абходу загадчыцы аддзяленнем лекар Пастноў звярнуўся з просьбай прадставіць яму паперу і ручку, каб напісаць скаргу. Але яму гэтага не далі, заявілі, што ён можа наўмысна траўмаваць сабе вока. Фактычна яго пазбавілі магчымасці падачы касацыйнай скаргі. Ён абвясціў, што пачынае бестэрміновую галадоўку".

Нагадаем, што лекар з Віцебску Ігар Пастноў быў накіраваны на прымусовае лячэнне пасля размяшчэння ў нітэрнэце відэазваротаў, у якіх ён жорстка крытыкаваў беларускую сістэму медычнага абслугоўвання.