Часопіс "Arche" трэці раз атрымаў адмову ў рэгістрацыі

Пра гэта Еўрарадыё паведаміў выканаўца абавязкаў галоўнага рэдактара Алесь Пашкевіч. Па яго словах, нагода для адмовы ў чыноўнікаў з Мінінфармацыі настолькі дробязная, што выглядае надуманай.

"Відавочна, што нас рэгістраваць не збіраюцца, паколькі чапляюцца зусім да драбязы. Вось я толькі што атрымаў ліст, і там гаворыцца, што нейкі нумар тэлефона не ўказаны. Карацей, зноў з-за вельмі дробнага фармальнага парушэння... Падамо яшчэ раз — чаму не? Мы нічога не трацім. Калі яны такую тактыку прынялі, то мы таксама будзем падаваць", - сказаў Алесь Пашкевіч.

Папярэднюю адмову ў рэгістрацыі "Arche" атрымаў на пачатку лютага. У атрыманым пазней пісьмовым тлумачэнні цвердзілася пра фармальныя прычыны адмовы ў рэгістрацыі.