На сёлетнюю прэмію Гедройца засталося 6 прэтэндэнтаў

Беларуска-польскае журы адабрала з дванаццаці кніг шэсць, піша “Наша ніва”.

У шорт-ліст уключаныя:

• Сяргей Балахонаў «Зямля пад крыламі Фенікса».
• Альгерд Бахарэвіч «Гамбургскі рахунак».
• Адам Глобус «Сказы».
• Уладзімір Някляеў «Аўтамат з газіроўкай з сіропам і без».
• Людміла Рублеўская «Авантуры Пранціша Вырвіча, шкаляра і шпега».
• Юрый Станкевіч «Шал».

У шорт-ліст не трапілі кнігі, якія высока ацэньваліся крытыкамі: «Рай даўно перанаселены» барысаўскай пісьменніцы Алены Брава, а таксама зборнік Андрэя Федарэнкі «Ланцуг».

Па словах старшыні Саюза пісьменнікаў Барыса Пятровіча, сябры журы самі былі шакаваныя вынікамі галасавання: у кожнага была свая шасцёрка, але вынік апынуўся непрадказальным.

Паводле меркавання Барыса Пятровіча, варта змяніць фармат прэміі і прапарцыйна падзяліць яе паміж некалькімі аўтарамі. «Агульнаеўрапейскі прынцып, на якім базуецца прэмія, не падыходзіць для Беларусі, — кажа Пятровіч. — Бо такая прэмія ў Беларусі адна, а ў еўрапейскіх краінах іх дзясяткі».

Члены журы: Валянцін Акудовіч, Уладзімір Арлоў, Павал Касцюкевіч, Ганна Кісліцына, Барыс Пятровіч, Андрэй Хадановіч, Малгажата Бухалік, Пётр Казакевіч, Адам Паморскі, Лешак Шарэпка.

Нагадаем, што лонг-ліст з 12 намінантаў на прэмію быў абвешчаны роўна месяц таму.