Да Андрэя Гайдукова дапусцілі адваката

Пра гэта Радыё “Рацыя” распавяла ягоная маці Вольга Гайдукова. Яна распавяла, што сын трымаецца нармальна, выглядае добра, са здароўем праблем не мае. У рэшце рэшт атрымаў пасылку ад родных. Таксама пачаў атрымліваць газеты, на якія яго падпісалі родныя. Гэта "Народная Воля", "Белгазета" і "Наша Ніва".

Па звестках маці, ніякіх следчых дзеянняў з яе сынам у апошні час не праводзіцца. Яна кажа, што пазіцыя Андрэя не мяняецца – ён не прызнае сваёй віны. 23-гадовы Гайдукоў абвінавачваецца ў здрадзе дзяржаве ў форме вядзення агентурнай дзейнасці.

“У яго сваё меркаванне, ён у апазіцыІ. Гэта ўсё, а якая віна? Ніхто з нашага бліжэйшага атачэння і наогул ніхто з разважных людзей, па-мойму, у гэта не верыць. Гэта смешна проста. Што там лепяць, мы не ведаем, вядома. Віну сваю ён не прызнае і не прызнае, нават калі там невядома пад якім ціскам нешта будзе, то ніхто ў гэта ўсё роўна не паверыць, тым больш што мы бацькі нават не сумняваемся ў тым, што ён не вінаваты”, - заявіла Вольга Гайдукова.

Нагадаем, што доўгі час да Андрэя Гайдукова не пускалі адваката, матывуючы гэта адсутнасцю памяшкання для сустрэчы.