Ігар Кузняцоў адказаў на яго абвяшчэнне КХП-БНФ персонай нон-грата ў Курапатах

"Гэты першы выпадак у практыцы, у тым ліку і таталітарных краінаў, калі грамадская арганізацыя забараняе чалавеку наведваць нейкую тэрыторыю. Тым больш тут гаворка ідзе пра месца пахавання, — заявіў Кузьняцоў "Свабодзе". - Гэта ўсё адно, што забараніць чалавеку ісці на могілкі. Гэта тое самае, што сказаць: вашыя погляды нас не цікавяць. Гэтая тэрыторыя нам падведамственна“.

"Калі КХП-БНФ зяўляецца "смотрящей“ за гэтай тэрыторыяй, то яны павінныя пра гэта заявіць. Уласна, яны ўчора і заявілі, што гэта нашая тэрыторыя“, — кажа Кузьняцоў.

 Гісторык адзначае: "Гэта катастрофа для гэтай партыі, лідэра Пазняка“.

 Ігар Кузняцоў дадаў, што і надалей будзе наведваць Курапаты.

4 лістапада адзін з лідэраў КХП-БНФ Валеры Буйвал заявіў: "Мы, патрыёты-фронтаўцы, абаронцы Курапацкай святыні абвяшчаем савецкага палітработніка, падпалкоўніка Кузняцова персонай нон-грата на тэрыторыі Курапацкай святыні і на тэрыторыі іншых святыняў, дзе ёсць пакутнікі нашага народа".

Канфлікт КХП-БНФ супраць Ігара Кузняцова пачаўся з-за помніка забітым польскім афіцэрам.

Раней старшыня КХП-БНФ Зянон Пазняк скрытыкаваў намер паставіць у Курапатах памятны знак забітым польскім афіцэрам.

У звароце Пазняка, які быў зачытаны на мітынгу ў Курапатах на Дзяды 28 кастрычніка гаворыцца: "Нядаўна адна такая асоба паведаміла, што група расейскага Мэмарыялу ў Беларусі заплянавала паставіць крыж у Курапатах у памяць "афіцэраў польскага войска, расстраляных у Беларусі“.

Як адкрывальнік, даследчык і кіраўнік археалагічнага даследавання Курапатаў у 1988 годзе нагадваю, што на сённяшні дзень няма абсалютна ніякіх падставаў і абсалютна ніякіх археалагічных фактаў, якія б давалі нагоду меркаваць, што ў Курапатах „расстраляныя афіцэры польскага войска“ (і ўвогуле якія-небудзь вайсковыя асобы чыйго-небудзь войска). Тут знойдзеныя трупы толькі выключна цывільных людзей, і ў асноўным — бедных сялян, абутых у галёшы і клееныя гумовыя бахілы". Аднак знак усталявалі 29 кастрычніка. На наступны дзень невядомыя яго скралі.