Прэзентацыя вынікаў даследавання ўплыву "Дажынак" на трнсфармацыю беларускіх гарадоў

На ей будуць прадстаўлены канчатковыя вынікі даследвання "дажыначных" трансфармацый у беларускіх гарадах.

"Дажынкі" як нацыянальнае свята ладзіцца ў Беларусі з 1996 года. З таго часу падзея перарасла ў нешта значна большае, чым этнаграфічнае свята ўборкі ўраджаю. Гэта мерапрыемства набыло свой палітычны і эканамічны сэнс і "абрасло" міфамі і стэрэатыпамі. І калі адны кажуць пра "дасягненне новых вышынь у гарадскім добраўпарадкаванні ды праявы клопату аб селяніне", другія паказваюць падзею як чарговую праяву "аграгламуру". Доўгі час менавіта такі ангажаваны падыход быў вызначальным, і па-за пафасам і жартамі заставаліся незаўважнымі "Дажынкі" як аб’ект сур’езнага даследавання, як праблема, вартая дыскусіі навукоўцаў, спецыялістаў, экспертаў. У 2012 годзе даследчая група Лятучага ўніверсітэту ўпершыню занялася распрацоўкай пытання захавання спадчыны і трансфармацыі гарадской ідэнтычнасці падчас падрыхтоўкі да "Дажынак". Міні-канферэнцыя "Дажынкі" і трансфармацыя беларускіх гарадоў" прэзентуе шырокай публічнасці вынікі даследавання. У шасці паведамленнях даследчыкі прадставяць нечаканы вобраз "Дажынак" з розных ракурсаў:

1. Планаванне "Дажынак" - заканадаўчае афармленне.
2. Дажыначны стандарт - падрыхтоўка да свята: планы, праекты.
3. "Дажынкі" як спосаб павышэння якасці жыцця гараджан.
4. "Дажынкі" і архітэктурная спадчына.
5. "Дажынкі" і жыццё беларускіх гарадоў ў люстэрку прэсы.

Мэта канферэнцыі - прыцягненне ўвагі спецыялістаў, экспертаў, чынавенства, журналістаў да "Дажынак" як да складанага сацыякультурнага феномена, як да масштабнага праекта, у выніку якога адбываюцца сур’езныя трансфармацыі гарадоў, а разам з гэтым аказваецца ўплыў на традыцыі памяці, гарадскую ідэнтычнасць, культурную своеасаблівасць і якасць жыцця беларускіх гарадоў. У сучаснай Беларусі практыка такіх "святочных" рамонтаў стала даволі распаўсюджанай: рэспубліканскія, абласныя "Дажынкі", Дні беларускага пісьменства. Такі падыход выяўляе шматлікія недахопы, і зразумела, што неабходны пераход да планамернай, узгодненай працы пры падрыхтоўцы да праектаў такога тыпу. Як магчыма здзейсніць гэты пераход? Ці могуць "Дажынкі" стаць тым кейсам, які б паказаў пачатковыя кропкі, ключавыя моманты, на якіх трэба сканцэнтраваць увагу? Якія яшчэ даследаванні былі б неабходныя ў гэтым накірунку?

Запрашаем да абмеркавання гісторыкаў, культуролагаў, архітэктараў, спецыялістаў і экспертаў па пытаннях захавання гістарычнай спадчыны, спецыялістаў па пытаннях праектавання развіцця гарадоў, дызайнераў, журналістаў, а таксама ўсіх зацікаўленых (папярэдне акрэдытоўвацца не трэба).

Вашай увазе размова пра "Дажынкі" кіраўніка даследчай групы Сцяпана Стурэйкі з Максімам Жбанковым, а таксама тэкст Сцяпана Стурэйкі, напісаны напярэдадні сёлетняга фестывалю, які прайшоў у Горках.

Мерапрыемства пройдзе 26 кастрычніка 2012 года (пятніца) ў Галерэі "Ў" (прасп. Незалежнасці, 37а). Пачатак у 16.00.

Запрашаем усіх зацікаўленых!

Па ўсіх пытаннях просім звязвацца з каардынатарам Юліяй Галіноўскай: (+375 29) 7422040, [email protected].