Еўропа глядзіць на Беларусь

Еўропа не збіраецца пазбаўляць Беларусь шанцаў далучыцца да працэсаў інтэграцыі. Гэткую выснову зрабіў шэраг беларускіх экспертаў, якія прымалі ўдзел у рэгіянальным кангрэсе недзяржаўных арганізацый. Форум адбыўся 25-27 лістапада ў Кіеве пры падтрымцы Рады Еўропы.

Кожная краіна мае сваю спецыфіку

Гэта быў другі падобны кангрэс — першая сустрэча адбылася летась у Варшаве. На сёлетні форум сабраліся прадстаўнікі недзяржаўных арганізацый Балтыйска-Чарнаморскага рэгіёна Еўропы — Расіі, Украіны, Беларусі, Польшчы, а таксама краінаў Прыбалтыкі і Каўказа.

Арганізацыі-ўдзельнікі мелі магчымасць прэзентаваць сітуацыю з грамадзянскай супольнасцю ў сваіх краінах. Амаль кожная краіна мае сваю спецыфіку, лічыць удзельнік сустрэчы, эксперт Агентства гуманітарных тэхналогій Андрэй Ягораў.

«Перад НДА розных краін стаяць абсалютна розныя праблемы, — сказаў Андрэй Ягораў у інтэрвію Eurobelarus.info. — Напрыклад, на Украіне, якая жыве ў сітуацыі дэмакратыі, перад недзяржаўнымі арганізацыямі стаіць пытанне поўнавартаснага ўплыву на працэс прыняцця палітычных рашэнняў. Для беларускіх НДА гэта толькі перспектыва. А ў Расіі адбываецца абваротны працэс. Раней арганізацыі трэцяга сектару мелі ўплыў на сітуацыю, але зараз краіна перажывае часы таталітарнага савецкага рэваншу. Сітуацыя ў Расіі паўтарае беларускую. Там ідзе аўтарытарызацыя, і гэты працэсс вельмі падобны на тое, як гэта адбывалася на Беларусі».

«У становішчы ўсеагульнага дысідэнства»

Што да сітуацыі ў самой Беларусі, дык і недзяржаўныя арганізацыі, і палітычныя партыі, і экспертныя суполкі ў нашай краіне знаходзяцца «ў становішчы ўсеагульнага дысідэнства», лічыць яшчэ адна ўдзельніца кіеўскага кангрэса, эксперт Агентства гуманітарных тэхналогій Святлана Мацкевіч.

«Пры гэтым адзінага погляда на агульнае становішча справаў у беларускіх арганізацый няма, — кажа Святлана Мацкевіч. — Кожны ідзе сваім шляхам».

«Нават пры ўсёй розніцы меркаванняў павінен весціся дыялог паміж арганізацыямі. Гэтага як раз і не хапае зараз. Замест гэтага ідзе нейкая “мышыная ваўтузня”, барацьба за рэсурсы. Хаця актыўнасць мусіць быць менавіта ў абмеркаванні прынцыпаў і тэхналогій далейшай дзейнасці, то бок змястоўных аспектах», — алзначыла эксперт Агентства гуманітарных тэхналогій у інтэрвію Eurobelarus.info.

«Еўропа цвяроза ацэньвае сітуацыю»

Між тым, Рада Еўропы робіць канкрэтныя крокі па працы з Беларуссю, нягледзячы на тое, што краіна фармальна не з’яўляецца сябрам гэтай арганізацыі.

«Зараз рыхтуецца адкрыццё інфармацыйнага офіса Рады Еўропы ў Беларусі, вядуцца пермовы на гэты конт з Міністэрствам замежных спраў, — адзначыў Андрэй Ягораў. — Да таго ж, Рада Еўропы адкрыла школу палітычных даследванняў для Беларусі. Гэта своеасаблівы інструмент дзеля еўрапеізацыі элітаў».

«Можна адназначна сказаць, што Еўропа глядзіць на Беларусь і ацэньвае тое, што адбываецца, — кажа Святлана Мацкевіч. — Прычым відавочна, што Еўропа цвяроза ацэньвае сітуацыю ў Беларусі, але вырашэнне пытання па змене становішча, відавочна, ляжыць на саміх беларусах».

Андрэй Аляксандраў

[email protected]