Крочым з 2017-га ў 2018-ы разам з Лятучым (Фота)

Напрыканцы года мы вырашылі ўзгадаць, што мы рабілі і чаго дасягнулі, аб чым думалі і клапаціліся цягам гэтага часу.

У гэтым годзе напоўніцу запрацавала новая Дыстанцыйная платформа Лятучага, якая была запушчаная ў вір інфармацыйнай прасторы напрыканцы снежня мінулага года. За гэты час платформа напоўнілася курсамі беларускіх інтэлектуалаў і адмыслоўцаў, прысвечаных шырокаму колу тэм: гісторыі беларускай думкі і філасофіі гісторыі, праблемам змены клімату і біяэтыкі, сістэмнаму падыходу і сацыяльнаму ўяўленню, выклікам сучаснай адукацыі і навейшай гісторыі Беларусі — усяго не пералічыць!

У траўні Дыстанцыйная платформа Лятучага ўніверсітэта абвесціла конкурс і запрасіла арганізацыі і ініцыятывы, навукоўцаў і мысляроў далучыцца да стварэння адукацыйных курсаў на супольнай універсітэцкай платформе. Па выніках рэйтынгавага галасавання наведвальнікаў платформы былі вызначаныя 5 курсаў. Пераможца конкурсу — курс "Гарады і змены клімату: што і навошта трэба ведаць" — ужо з’явіўся на платформе, а для стварэння астатніх была распачата краўдфандынгавая кампанія "ВЕДЫ ONLINE". Кампанія атрымалася такой удалай, што (дзякуючы вашай падтрымцы!) мы здолелі выйсці нават за межы першасных задумаў і замест чатырох абраных курсаў цяпер маем магчымасць зрабіць пяць!

Такім чынам, у наступным годзе на дыстанцыйная платформе вас чакаюць анлайн-курсы:

• "Творчая фатаграфія ў Беларусі на стыку ХХ і ХХІ стагоддзяў: ідэі, падзеі, дзеючыя асобы" (Уладзімір Парфянок);
• "Гульня як фенамен культуры" (Уладзімір Мацкевіч, Таццяна Вадалажская);
• "Практычная палітыка: арыентацыя і дзейнасць у свеце палітычнага" (Андрэй Ягораў);
• "Адкрытыя дадзеныя ў 7 пытаннях" (Аліна Радачынская);
• "Дзве гісторыі стварэння ў Кнізе Роду" (Ірына Дубянецкая).

І не толькі, таму сачыце за абнаўленнямі на нашай дыстанцыйнай платформе!

Штогадовая канферэнцыя Лятучага ўніверсітэта ў гэтым годзе прайшла напачатку сакавіка. Разуменне выклікаў сучаснага стану гуманітарных працэсаў вызначыла тэму канферэнцыі: "Тэхнікі і тэхналогіі чалавечага". Цягам канферэнцыі мы паглыбляліся ў тыя сферы, дзе ствараецца і аднаўляецца чалавечае ў чалавеку, і разбіраліся з тымі інструментамі мысленння і дзейнасці, якія прыдатныя для вырашэння гэтых задач.

Вясна гэтага года прайшла ў Лятучым пад знакам "Колеру Беларусі". Выстава і кніга-альбом вядомага беларускага дызайнера, мастака Міхала Анемпадыстава пад гэтай назвай, а таксама шэраг падзей, якія спарадзіла гэтае выданне, наварочвалі нас да абмеркавання спосабаў жыцця спадчыны і традыцыі ў сучасным свеце, феномена колераў у культуры, месца колеру ў фармаванні ідэнтычнасці нацыі і асобы.

Але вясна-2017 была адзначаная не толькі пошукамі і набыткамі ў інтэлектуальным і культурным вымярэнні, але і складаным сацыяльна-палітычным кантэкстам, які патрабаваў грамадзянскай рэакцыі. Шэраг сябраў калегіума Лятучага разам з іншымі беларускімі інтэлектуаламі і творцамі зладзілі сваеасаблівы "інтэлектуальны марафон" салідарнасці з усімі затрыманымі ды пацярпеўшымі ад рэпрэсій цягам сакавіцкіх падзей пад назвай "Слова ў абарону свабоды і годнасці", які прайшоў у кнігарні "ЛогвінаЎ".

Адной з цэнтральных змястоўных падзей года сталася першая агульнаўніверсітэцкая гульня, што адбылася 10-14 траўня 2017 года і была прысвечана тэме: "Універсітэт і інфраструктура інавацый: стратэгія ўстойлівай камунікацыі суб’ектаў інавацыйнай дзейнасці". Вынікі гульні знайшлі свае адлюстраванне ў шэрагу тэкстаў: "Аб гульні па распрацоўцы інтэрфейсаў камунікацыі ў інавацыйных працэсах" і "Глабальнае пацяпленне пасля халоднай вайны" Уладзіміра Мацкевіча, "Інавацыйны час і мы" Таццяны Вадалажскай, а таксама ў працы з новымі тэмамі (напрыклад, тэмай блакчэйну) і праграме Лятучага на наступны год (чакайце абвестак напрыканцы студзеня!).

Традыцыйная летняя школа Лятучага ўніверсітета адбылася ў гэтым годзе напачатку ліпеня на хутары Шаблі. Універсітэцкі летнік стаў натуральным працягам роздуму і дыскусій вакол кардынальных змен сусвету, якія нясе выбух тэхналагічнага развіцця і эпоха інавацыйнага паскарэння. Тэма летніка гучала як "Гэты дзіўны новы свет", адсылаючы нас да антыўтопіі Хакслі і наогул да праблематызацыі сацыяльнага і гуманітарнага вымярэння інавацыйных працэсаў.

У гэтым годзе мы працягнулі працу ў адносна новай да нас сферы — урбаністыцы. Праграма ўжо другога набора Школы "Гарадскія грамадскія прасторы: устойлівае развіццё", якая ладзілася Лятучым універсітэтам у партнёрстве з таварыствам "Зялёная сетка", альманахам "Гарадскія тактыкі", "Архітэктурным бюро 35" і Беларускай партыяй "Зялёныя", будавалася пад агульнай рамкай канцэпцыі "Зялёны горад". Напачатку верасня выпускнікі школы — маладыя архітэктары, урбаністы, грамадскія актывісты — прэзентавалі вынікі групавой даследніцкай практыкі і ўласныя праекты развіцця грамадскіх прастор.

Новы навучальны год адкрываўся, як звычайна, публічнай падзеяй. Але ў гэтым годзе мы вырашылі абысціся без фармальных прэзентацый і зрабіць больш адпаведную Лятучаму размову з асобамі, інтэлектуаламі, якія вядуць курсы і семінары ў гэтым годзе. Мы скарысталіся фарматам "Жывой бібліятэкі", і разам з імі зрабілі сваеасаблівы дзень адкрытых дзвярэй "Без кафедр і мантый".

У гэтым годзе ў нас шмат што адбылося зрабіць разам — разам з іншымі навуковымі, адукацыйнымі, інтэлектуальнымі і грамадскімі ініцыятывамі. Нам прыемна ўзгадваць падзеі і партнёраў, да якіх мы далучаліся ў гэтым годзе. Найбльш змястоўнымі і цікавымі з сумесных ініцыятываў для нас сталі:

• Публічная лекцыя і дыскусія "Клімат змяняецця. Ці змяняемся мы?" (сумесна з таварыствам "Зялёная сетка", Амбасадай Францыі ў Беларусі і праектам "Наука па-за сабой");
• Public Space Day (сумесна з альманахам "Гарадскія тактыкі", Беларускай партыяй "Зялёныя", таварыствам "Зялёная сетка", "Архітэктурным бюро 35", а таксама ініцыятывай "Добры горад/Good city");
• Міжнародная навуковая канферэнцыя "Логас і патас: гуманітарная рэфлексія ва ўмовах вайны" (сумесна з Міжнароднай асацыяцый гуманітарыяў; Еўрапейскім гуманітарным ўніверсітэтам, Цэнтрам міждысцыплінарных гуманітарных даследаванняў, Інстытутам палітычных даследаванняў "Палітычная сфера");
• Міжнародная канферэнцыя "Масавыя рэпрэсіі ў СССР у гістарычных даследаваннях і калектыўнай памяці" (сумесна з Беларускім архівам вуснай гісторыі, Інстытутам славістыкі ПАН, Польскім інстытутам у Мінску);
• "Нядзеля спадчыны" (сумесна з фестывалем дакументальнага кіно Watch Docs Belarus і Беларускім камітэтам ICOMOS).

Мы вельмі радыя нашаму супрацоўніцтву і спадзяемся, што яно працягнецца і ў наступным годзе!

Напрыканцы года мы шчыра жадаем усім нашым партнёрам, калегам, сябрам і слухачам шчодрых Калядаў і шчаслівага Новага года! Жадаем, каб свет вакол заставаўся такім жа адкрытым, захапляльным і поўным магчымасцей, як у дзяцінстве. Хай амбітнасць мар і высокі палёт думак знаходзіць натхненне і апірышча ў вернасці сябе і падтрымцы сяброў і калег!