КДБ не ведае, дзе знаходзіцца Статкевіч

Марына Адамовіч, жонка палітыка, спрабавала высветліць гэта ў міліцыі і КДБ, але марна. 27 сакавіка яна збіраецца падаваць заяву аб знікненні чалавека.

Сёння прадстаўнік Камітэту дзяржаўнай бяспекі Дзмітры Пабяржын сказаў, што ведамства не мае ніякіх звестак пра тое, дзе цяпер можа быць Статкевіч.

Напярэдадні тэлеканал СТБ паказаў сюжэт, у якім супрацоўнікі КДБ атрымалі аператыўную інфармацыю аб правакацыі, якая нібыта рыхтавалася ў Мінску падчас акцыі на Дзень Волі.

"Пад аператыўнае назіранне трапіў прыпаркаваны 23 сакавіка на стаянцы ў раёне Акадэміі навук легкавы аўтамабіль. Ужо ўстаноўлены чалавек, які прыгнаў машыну на гэтае месца. Гэта 32-гадовы жыхар Мінску Сяргей Кунцэвіч, — перадае СТБ. - У аўтамабілі як быццам знойдзеныя гукаўзмацняльная апаратура, правады, мікрафон і кардонныя каробкі з дзясяткамі бутэлек, напоўненых вадкасцю з пахам гаручай сумесі і з кнотам з анучаў. Як высветлена, Кунцэвіч — прыхільнік Беларускага нацыянальнага кангрэсу, ініцыятарам якога ёсць Статкевіч".

Адамовіч удакладніла, што Сяргей Кунцэвіч — сябра аргкамітэту Беларускай сацыял-дэмакратычнай партыі "Народная грамада", але ніколі не быў кіроўцам Статкевіча, паведамляе "Радыё Свабода".