Дзень волі: пад тысячу затрыманых, Мінск у паўваенным становішчы (фота, відэа)

Улада паказала сваю тэхнічную моц і маральную слабасць. Усё было зроблена пісьменна: ператрус і затрыманні на «Вясне», ачапленне праспекта Незалежнасці блізу Акадэміі навук, а потым, лічы і ўсяго, раздрабненне амапаўцамі людзей на групы – дзеля больш зручнай і «прадуктыўнай» зачысткі – а людзі ішлі.

Улада напалоханая, гэта зразумела па істэрычнасці апошніх дзён, па дзеяннях напярэдадні і на сам Дзень волі, страх перад пратэстамі аказаўся большы, чым жаданне атрымаць заходнія крэдыты і рознага кшталту прэферэнцыі.

Грамадства ж прадэманстравала, што здольнае самарганізоўвацца і без палітычных лідэраў, што можа трымаць удар. Так, затрыманні былі жорсткімі і шматлікімі, але той разгубленасці, адчаю, безвыходнасці, якую мы памятаем падчас снежня 2010 года, зараз не было. Людзі трымаліся годна – і пасля хвалі затрыманняў праз нейкі прамежак часу падымалася новая хваля ў накірунку цэнтра сталіцы. Не дайшлі, зразумела, вельмі ж трывалыя перашкоды былі на шляху, але свята адзначылі з максімальна магчымай у такіх варунках годнасцю. І па настроі беларусаў, што былі на вуліцах Мінска 25 сакавіка, ясна, што гэта не апошні пратэст сёлетняй вясной.

На разгон акцыі пратэсту Захад пакуль адазваўся заявамі з асуджэннем дзеянняў беларускай улады. Кіраўнік Езрапейскай народнай партыі Жозэф Доль прыгразіў афіцыйнаму Мінску вяртаннем санкцый.

Дагэтуль невядома, дзе знаходзіцца палітык Мікола Статкевіч, які збіраўся часткова ўзначаліць пратэст. Афіцыйныя СМІ пішуць пра правал беларускага Майдана, але без асаблівых абраз у адрас пратэстоўцаў – стараюцца як мага менш узгадваць пра затрыманні, даючы карцінку пустых прыступак Акадэміі навук.

Пад ноч з 25-га на 26 сакавіка з пастарункаў пачалі адпускаць людзей, часцей за ўсё – без складання пратаколаў.