Аргкамітэт святкавання Дня Волі зацвердзіў маршрут шэсця

«Улічваючы парушэнне заканадаўства з боку ўладаў, якія ў вызначаны законам тэрмін не далі адказу на заяўку, аргкамітэт святкавання Дня Волі зацвердзіў маршрут правядзення да атрымання дазволу на акцыю», - гаворыцца ў паведамленні прэс-службы Руху «За Свабоду».

Аргкамітэт зацвердзіў наступны сцэнарый: збор удзельнікаў у 14-00 на пляцоўцы каля Акадэміі навук, там жа адбудзецца мітынг. Далей шэсце пройдзе па праспекце Незалежнасці да Кастрычніцкай плошчы, там будзе праведзены мітынг і акцыя завершыцца.

«Улічваючы негатыўны досвед падзеяў 2010 году, любыя адхіленні ад гэтага сцэнару, у тым ліку працяг руху і выхад на плошчу Незалежнасці, з’яўляюцца небяспечнымі і безадказнымі», - заявілі аўтары заявы.

Аргкам заклікаў праваахоўныя органы «выканаць свой асноўны абавязак - забяспечыць канстытуцыйнае права грамадзянаў на правядзенне мірнай акцыі і не перашкаджаць правядзенню мірнага мерапрыемства». Таксама палітыкі звярнуліся да ўдзельнікаў акцыі, якіх папрасілі у выпадку перакрыцця руху не набліжацца да супрацоўнікаў міліцыі і не ўступаць з імі у сутыкненні.

У аргкамітэт уваходзяць Партыя БХД, АГП, БНФ, Рух «За свабоду», Рух салідарнасці «Разам». Заява была падпісаная ўсімі суб'ектамі камітэту. Прадстаўнік Руху салідарнасці «Разам» падпісаў заяву з асабістым меркаваннем.