Павел Якубовіч выбачыўся перад апазіцыйным актывістам Леанідам Кулаковым

Кулакоў не першы месяц спрабуе абскардзіць адміністрацыйнае рашэнне за арышт на 3 сутак у дзень парламенцкіх выбараў 11 верасня 2016 года. Ён быў адным з назіральнікаў ад кампаніі "Права выбару" па 108-ай Каліноўскай выбарчай акрузе.

Пасля закрыцця выбарчага ўчастку Кулакоў сеў на лаву пад’есці, як у хуткім часе да яго падбегла міліцыя, затрымалі, правяралі на ўжыванне алкаголя, але ўсё паказвала па нулях. Тым не менш, гэта не перашкодзіла на сайце ГУУС змясціць матэрыял, што ў крыві Кулакова было 1 праміле алкаголю.

У хуткім часе ў "СБ" выйшла публікацыя "Кепская гісторыя", дзе пераказваецца гісторыя з алкаголем. Судзілі ж Кулакова па артыкуле 23.4 "Супраціў міліцыі", а не за распіццё алкаголя.

"Павел Якубовіч прызнаў, што публікацыя на сайце ГУУС была фальсіфікацыяй. Спачатку яны пісалі пра 1 праміле, потым паправілі на 0,5. Але ж я быў цалкам цвярозы! Згадзіўся, што браць інфармацыю без пераправеркі небяспечна. Была абвешчана вымова журналісту, што пісаў гэтую нататку", — расказаў Кулакоў.

Якубовіч папрасіў прабачэнні за гэтую публікацыю, а таксама паабяцаў змясціць пісьмовае абвяржэнне. "Я папрасіў невялікую матэрыяльную кампенсацыю — падпіску на год на "Народную волю". На што рэдактар прапанаваў мне напісаць ліст у рэдакцыю аб сітуацыі, а на ганарар зрабіць, што захачу", - сказаў Кулакоў.

Агулам сустрэча Кулакова і Якубовіча доўжылася каля 3 гадзін. Шмат размаўлялі пра Курапаты. "Рэдактар "СБ" прызнае, што гэта месца рэпрэсій. І кожны мусіць скінуцца па капейцы на памятны знак у гэтым месцы", — расказаў Кулакоў "Нашай ніве".