Аблава на абаронцаў Курапатаў. Пальчэўскі атрымаў 10 сутак арышту

А 19-й гадзіне стала вядома, што ў судзе Першамайскага раёна Мінска Сяргея Пальчэўскага , які падчас пратэсту супраць будоўлі ў Курапатах прыкаваў сябе кайданкамі да грузавіка, асудзілі да 10 сутак арышту па артыкуле 23.34 Адміністрацыйнага кодэксу «Удзел у несанкцыянаванай акцыі». За якую дату акцыя, пакуль не вядома, паведамляе «Радыё Рацыя».

Лідэр намётавага гарадка ў Курапатах Зміцер Дашкевіч змог дабрацца дадому. Кажа, што дапамаглі журналісты, якія прыехалі да кватэры яго сяброў. Затрымліваць перад камерамі сілавікі не адважыліся.

Дашкевіч звязвае гэты ціск з учорашнімі перадачамі, што выйшлі на тэлеканалах АНТ і БТ: «Там жа казалі пра графіці, Леніна, збітых бабуль. Думаю, ім рэзанула, што нам атрымалася дасягнуць поспеху ў Курапатах. Нервы ва ўладаў здалі. Калі б сёння стаяў намётавы гарадок у Курапатах, то сёння ён быў ужо зачышчаўся спецназам».