У Берасці судзяць прадстаўнікоў анархісцкага руху і затрыманых напярэдадні маршу актывістаў

Учора вечарам у Берасці на кватэрах супрацоўнікі міліцыі затрымалі 5 прадстаўнікоў анархічнага руху. Ноч яны правялі ў ІЧУ Ленінскага РАУСа.  Праваабаронцы з Берасця паведамляюць мяркуемыя прозвішчы затрыманых: А. Д., Р.Ч., А.К., П. З. і Д. Л.

Затрыманых даставілі ў суд толькі пасля 13 гадзін. Іх вядуць у невялікую залу.

Па інфармацыі ПЦ “Вясна”, на прадстаўнікоў анархісцкага руху пасля акцыі ўчынілі сапраўднае паляванне па ўсім горадзе.

Анархісты ў колькасці паўтары дзесяткі чалавек, па-сутнасці, былі самымі арганізаванымі на акцыі пратэсту і здолелі павесці за сабой астатніх удзельнікаў мітынгу.

Яшчэ аднаго ўдзельніка “маршу недармаедаў” судзяць у Берасці 6 сакавіка. Суд Ленінскага раёна прызначыў на 12 гадзін разгляд адміністрацыйнай справы Андрэя Шарэнды. Яго затрымалі 3 сакавіка ўвечары і змясцілі да суда ў ІВС.

На суд да Шарэнды прыйшло некалькі дзесяткаў чалавек. Яны не могуць размясціцца ў судовай залі. Суд пачаўся. 

Суддзя  Аляксандр Семянчук паспрабаваў выдаліць з залі жанчыну, якая папрасіла сведак гучней гаварыць. Калі яна, а гэта была жонка Шарэнды, адмовілася – яе паспрабавалі выдаліць  гвалтоўна, з прымяненнем фізічнай сілы. За яе заступіліся іншыя. Хацелі выштурхнуць з суда яшчэ аднаго юнака-абаронцу.  Прысутныя на судзе актыўна прасілі суддзю іх не выдаляць, урэшцэ ён змушаны быў пагадзіцца. Андрэй Шарэнда выказаў суддзі недавер. Шарэнда задаў пытанне сведку – супрацоўніку міліцыі: вы былі пры выкананні, чаму не прадухілілі парушэнне? Суд адхіліў пытанне, паколькі яно, маўляў, не па пратаколе.

Той адхіліў недавер і пастанавіў прызнавь яго вінаватым у парушэнні арт. 23.34 КаАП і  пакараць актывіста штрафам у 25 базавых велічынь за ўдзел у акцыі пратэсту 26 лютага.