Офіс Аршанскай кааліцыі дэмакратычных сілаў ўзялі ў аблогу міліцыянты

Пра гэта Свабодзе паведаміў кіраўнік моладзевай суполкі «Зьвяз» Ігар Казмярчак:

«Прадстаўнікі розных грамадскіх структур сабраліся ў офісе па вуліцы Чырвонаармейскай, 13, каб абмеркаваць бягучыя справы. Усяго нас каля 15-ці чалавек. Дзверы мы звычайны не зачыняем на замок, бо не робім нічога незаконнага. Хвілін 20 таму да нас пагрукалі і зайшлі міліцыянты. Заявілі, што да іх „паступіў сігнал“, нібыта ў нас займаюцца вырабам фальшывых грошай.

Неўзабаве пад’ехалі людзі ў цывільным, са Следчага камітэту. На дадзены момант пайшлі па вуліцы — а гэта прыватны сектар — каб шукаць панятых. Хаця пастановы на ператрус нам ніхто не прад’явіў».

Паводле Ігара Казьмерчака, службоўцы спачатку патлумачылі, што хочуць толькі апытаць усіх прысутных. Аднак яшчэ праз колькі хвілінаў прывезлі пастанову на ператрус, які мае неўзабаве пачацца.

Спадар Казмярчак звязвае нечаканы візіт з тым, што 12-га сакавіка ў Воршы плануецца «Марш недармаедаў». Звесткі пра гэта ўжо распаўсюджаны па сацыяльных сетках, а таксама размешчаны на мясцовым незалежным сайце orsha.eu.