Мінгарвыканкам вывучыць факты парушэнняў падчас будаўніцтва каля Курапатаў

Мінгарвыканкам праверыць факты парушэнняў падчас будаўніцтва офіснага будынку каля Курапатаў. У сераду група апазіцыянераў аднесла чыноўнікам адпаведны зварот.

Намеснік старшыні Мінгарвыканкама Віктар Лапцеў паабяцаў праверыць факты парушэнняў. Будоўля можа быць прыпыненая на некалькі дзён.

“Добры вынік сустрэчы. Ён сказаў, што паколькі сітуацыя ў Курапатах гарачая, то на некалькі дзён удаўніцтва там можа быць прыпыненае”, - распавёў "Еўрарадыё" старшыня Партыі БНФ Аляксей Янукевіч.

Як вядома, ужо некалькі дзён працягваецца акцыя пратэсту супраць будаўніцтва каля Курапатаў, месца, дзе пахаваныя дзясяткі тысяч ахвяраў сталінскіх рэпрэсій. Адбыліся сутычкі актывістаў і будаўнікоў. Сёння міліцыянеры склалі на некалькіх удзельнікаў акцыі адміністрацыйныя пратаколы за перашкоду ў правядзенні будаўнічых работ.