Беларусы змогуць ездзіць без візы ў Аргентыну

У Палату прадстаўнікоў з Саўміну паступіла пагадненне паміж урадамі Беларусі і Аргентыны аб узаемных бязвізавых паездках грамадзян. Пра гэта Свабодзе паведамілі ў парламенцкай камісіі міжнародных спраў.

Дакумент прадугледжвае, што ўладальнікі ўсіх тыпаў беларускіх пашпартоў цягам каляндарнага года могуць знаходзіцца ў Аргентыне 90 дзён без візы. Каб пагадненне пачало дзейнічаць, яго патрэбна ратыфікаваць (а гэта робіцца ў адным чытанні) Палатай прадстаўнікоў. Дэпутаты разгледзяць гэтае пытанне на веснавой сесіі, якая традыцыйна пачынаецца 2 красавіка.

Адказваючы на пытанне аб перспектывах пашырэння безвізавага рэжыму, прэс-сакратар Міністэрства замежных спраў Беларусі Дзмітрый Мірончык адзначыў:

«Мы вядзём перамовы аб палягчэнні візавага рэжыму з шэрагам дзяржаў. Калі пачынаць здалёк, то ў Азіі я магу згадаць Сінгапур, Малайзію, Філіпіны, Рэспубліку Карэю. Сярод лацінаамэрыканскіх краінаў у актыўнай фазе перамовы з Уругваем, Перу, Гандурасам. У Еўропе — Македонія, у Персідскай затоцы — Аман. З усімі гэтымі краінамі мы вядзём справы да таго, каб палегчыць візавы рэжым альбо ўвесці бязвізавы.

Летась уступіў у сілу шэраг падобных пагадненняў. Так, з 25 лістапада мінулага года дзейнічае пагадненне пра бязвізавыя паездкі ў Бразілію».