На апошні дзень сплаты збору легалізаваліся толькі 10% «дармаедаў»

У Міністэрстве па падатках і зборах адзначаюць, што вызначаную суму — 360 рублёў, або 180 даляраў у эквіваленце — сплацілі блізу 48 000 чалавек. Гэта роўна 10% ад усёй колькасці «дармаедаў», якіх ведамства налічыла агулам па краіне — больш за 470 тысяч. Адпаведна, у бюджэт паступіла прыкладна 14 мільёнаў рублёў, што нашмат менш за планаваныя лічбы, піша Радыё Свабода.

Паведамляецца, што ад збору могуць вызваліць тых, хто апынуўся ў «складанай жыццёвай сітуацыі». Адпаведныя заявы разглядаюць мясцовыя органы ўлады. Калі жыццёвая сітуацыя заяўніка падасца ім недастаткова складанай, выплаціць збор трэба будзе цягам 30 каляндарных дзён пасля 20 лютага. Іначай — дадатковы штраф у памеры ад 2 да 4 базавых велічынь або адміністрацыйны арышт.

Пакуль лік задаволеных скаргаў вымяраецца ўсяго некалькімі сотнямі па ўсіх рэгіёнах Беларусі. У палове выпадкаў гаворка ідзе пра грамадзян, якія пацвердзілі, што былі ў 2015 годзе за мяжой. Яшчэ адна вызваленая катэгорыя — бацькі, якія выхоўваюць дзяцей да 7 гадоў.