Прарасійскіх актывістаў пакуль не пакаралі за несанкцыянаваны пікет у Мінску

Былы дэсантнік, мянчук Сяргей Ланавенка разам з 6 паплечнікамі выйшаў на пікет у падтрымку Расіі, які адбыўся 4 лютага на плошчы Незалежнасці. Тады ў якасці арганізатара акцыі выступіў рух НОД.

Праз некалькі дзён з'явілася інфармацыя, што ўдзельнікаў пікету пакаралі штрафам памерам 30 базавых велічыняў. Аднак сам Ланавенка абвяргае гэтыя звесткі, паведамляе Радыё Свабода. Ён расказаў, што ў канцы мінулага тыдня з ім сапраўды гутарыў міліцыянт з Маскоўскага РАУС, але ні суду, ні пакарання не было.

— Мы проста сустрэліся ў горадзе, міліцыянт узяў мае паказанні, запісаў, як усё было, і разышліся. Пра 30 базавых я даведаўся з апазіцыйных сайтаў! Мне не паведамілі, ці будзе ўвогуле суд і колькі трэба заплаціць штрафу. Проста нейтральная гутарка адбылася, — кажа Ланавенка.

На пытанне, ці збіраюцца актывісты зладзіць падобную акцыю ў найбліжэйшай будучыні, Сяргей адказвае:

— Чарговы пікет будзе ў любым выпадку, бо трэба працаваць з Расіяй, з Данбасам... Але наступным разам мы возьмем дазвол ва ўладаў. Ведаеце, ёсць адрозненне паміж законам і справядлівасцю...

Актывіст сцвярджае, што не ведаў астатніх пікетоўцаў у рэальным жыцці — яны «проста перапісваліся ў інтэрнэце».

— А пасля дамовіліся выйсці на вуліцу. Я за ўласныя грошы замовіў у гандлёвым цэнтры «Сталіца» той расійскі сцяжок, за паўтары гадзіны яго вырабілі. Да руху НОД стала належыць толькі Рыжанкоў, я не маю дачынення да НОДу. І я не разумею, чаму нацыяналістам можна маршыраваць па вуліцах, а мне нельга выказаць сваю пазіцыю? — пытаецца Ланавенка.

Прэсавы сакратар мінскай міліцыі Аляксандар Ластоўскі паведаміў, што ён не валодае дакладнай інфармацыяй, ці адбыўся суд над удзельнікамі прарасійскага пікету, але зазначыў, што на іх складзеныя пратаколы і перададзеныя ў суд Маскоўскага раёна Мінска.