Заява беларускіх НДА: Сітуацыя з Жаданам сведчыць пра несамастойнасць уладаў Беларусі

"Выказваем абурэнне з прычыны ганебнага затрымання паважанага госця і даўняга сябра Беларусі Сяргея Жадана. Перакананыя, што такія дзеянні ўладаў сведчаць аб несамастойнасці ў прыняцці важных рашэнняў, якія не толькі не адпавядаюць інтарэсам незалежнай Беларусі, але і наносяць непапраўную шкоду іміджу нашай суверэннай дзяржавы, а таксама ставяць пад пытанне ролю Беларусі як нейтральнай пляцоўкі для перамоваў у расійска-ўкраінскім канфлікце", - гаворыцца ў заяве Саюза беларускіх пісьменнікаў, Беларускай асацыяцыі журналістаў, Беларускага ПЭН-цэнтру, "Беларускага калегіюму" і праграмы "Лятучы ўніверсітэт".

Аўтары заявы звяртаюцца да кампетэнтных органаў дзяржаўнай улады з патрабаваннем адмяніць рашэнне аб дэпартацыі і забароне на ўезд Жадана, выказаць яму афіцыйныя прабачэнні і прыняць адпаведныя меры для прадухілення такіх інцыдэнтаў у будучыні.

Нагадаем, Сяргей Жадан удзельнічае ў VI Міжнародным паэтычным фестывалі імя Міхася Стральцова "Вершы на асфальце", які адкрыўся ў Мінску 10 лютага.

Міліцыянеры затрымалі Жадана ноччу 11 лютага ў яго нумары ў мінскай гасцініцы "Юбілейная". Затрыманы пераначаваў у камеры Ленінскага РУУС, атрымаўшы ў выніку забарону на ўезд у Беларусь на нявызначаны тэрмін — з-за забароны на ўезд у Расію "за датычнасць да тэрарыстычнай дзейнасці", якая была ўведзена ў дачыненні да яго яшчэ ў 2015 годзе.

Сяргей Жадан — вядомы ўкраінскі паэт, празаік, эсэіст, перакладчык. Жыве і працуе ў Харкаве. Рэгулярна выступае са сваімі творамі ў розных гарадах Украіны і Еўропы — у тым ліку ў суправаджэнні ўкраінскіх музыкантаў, у прыватнасці групы "Сабакі ў космасе".

Удзельнічаў у харкаўскім Еўрамайдане, у сакавіку 2014 года быў збіты падчас сутыкненняў з прыхільнікамі «русского мира».

У 2016 годзе ўзнагароджаны дзяржаўнай прэміяй "Украінская кніга года", сродкі ад якой накіраваў на дапамогу дзіцячым установам Луганскай вобласці.