Жанчына ў Мінску залезла са сцягам на кран, пратэстуючы супраць зносу дома (ФОТА)

Па словах яе сына, маці залезла на кран яшчэ вечарам у панядзелак.

Яна працягвае знаходзіцца на кране, кажа, што злазіць не збіраецца, перадае "Наша Ніва".

Унізе дзяжураць супрацоўнікі МНС.

Яны разгарнулі пад вежавым кранам надзіманую канструкцыю. Прыбыло кіраўніцтва раёна і начальнік ГУУС Мінгарвыканкама Аляксандр Барсукоў. Ён паабяцаў Галіне Канстанцінаўне, што гатовы, калі яна спусціцца, асабіста адвезці яе на перамовы са старшынёй Мінгарвыканкама Андрэем Шорцам.

«Я не ведаю, на якіх умовах яна гатовая спусціцца, — сказаў сын Канстанцін. — Яна таемна ўсё рыхтавала. Учора сказала, што ў яе ёсць два планы. Але ніхто не думаў, што сярод іх можа быць такі».

Галіна Ігнатовіч патрабуе справядлівай кампенсацыі за знос свайго дома ў Лябяжым, пагражаючы саскочыць уніз.

Сёння яе сям'ю павінны былі прымусова выселіць судовыя выканаўцы. Дом жанчыны павінен быў знесці забудоўшчык «Тапас» пад будаўніцтва свайго комплексу «Алімпік Парк», кампенсаваўшы жыхарам знос. Але кампенсацыя, якую прапанаваў забудоўшчык некалькім сем'ям — а гэта тры неновыя кватэры — людзей не задаволіла.

Раніцай нявестка Святлана паспрабавала ўгаварыць Галіну спусціцца, дабралася да сярэдзіны вышыні крана, але Галіна прыгразіла, што саскочыць уніз — і Святлане давялося спусціцца.