Больш 500 подпісаў пастаўлена за перайменаванне вуліцы Камсамольская ў вуліцу Слуцкіх паўстанцаў

Каардынатар руху "За Свабоду" ў Мінскай вобласці Віталь Амяльковіч у пачатку студзеня ініцыяваў збор подпісаў за перайменаванне вуліцы Камсамольскай у вуліцу Слуцкіх паўстанцаў. Подпіс можна паставіць анлайн на рэсурсе Zvarot.by яшчэ тры дні. 1 лютага подпісы будуць дасланыя адрасатам.

"Случакі і я асабіста, усе тыя неабыякавыя людзі, каторым важна захаваць памяць пра падзеі Слуцкага збройнага чыну, якія паважаюць свядомы выбар Герояў нашай Бацькаўшчыны, усе мы вельмі ўдзячны тым, хто падтрымаў кампанію па перайменаванні ў горадзе Слуцку вуліцы Камсамольскай у вуліцу Слуцкіх паўстанцаў", — пракаментаваў прагрэс у зборы подпісаў сайту рyx.by Амяльковіч.

Па ягоных словах, "актыўнасць случакоў і падчас рэальнага збору подпісаў, і падчас анлайн кампаніі даказвае, што вуліца Слуцкіх паўстанцаў станоўча ацэньваецца жыхарамі гораду". "Мы робім важную і адказную справу, і не маем права спыняцца", — падкрэсліў Амяльковіч.

Кампанія па змаганні за вуліцу Слуцкіх паўстанцаў будзе працягвацца нават пры адмоўным рашэнні слуцкіх уладаў. Арганізатары ўжо маюць ідэі публічных акцыяў, якія яны правядуць у Слуцку.

Амяльковіч адзначыў, што "вуліца Слуцкіх паўстанцаў абавязкова з’явіцца ў Слуцку, і ворагам беларушчыны, і ім памагатым прыйдзецца прыняць гэты факт".