Беларусь паднялася з 107-га на 79-е месца ў індэксе ўспрыняцця карупцыі

Беларусь у рэйтынгу за 2016 год атрымала 40 балаў са ста магчымых (у 2015-м было 107-е месца з 32 баламі). Такі ж паказчык у Бразыліі, Кітаю ды Індыі.

Краіны з самым нізкім узроўнем успрымання карупцыі — гэта Данія, Новая Зеландыя, Фінляндыя, Швецыя і Швейцарыя. У канцы спісу знаходзяцца Паўночная Карэя, Паўднёвы Судан і Самалі.

ЗША займаюць 18-е месца (74 балы), Нямеччына і Вялікая Брытанія — 10-е (па 81 бале).

Расія ў 2016 годзе атрымала 29 балаў і знаходзіцца на 131-м месцы, дзелячы яго з Украінай, Непалам, Казахстанам і Іранам. Летась Расія займала 119-е месца, Украіна — 130-е, Казахстан — 123-е.

Польшча ў 2016 годзе апынулася на 29-м месцы, у яе 62 балы. Сярод краін Балтыі найменш карумпаванай аказалася Эстонія — яна на 22-месцы ў рэйтынгу з 70 баламі. Літву эксперты размясцілі на 38-й пазіцыі (59 балаў), Латвія — на 44-й (57 балаў), паведамляе "Радыё Свабода".