Эстонія і Літва, следам за Латвіяй, падпісалі пагадненне з ЗША пра абароннае супрацоўніцтва

Гэта было зроблена для таго, каб фармалізаваць прысутнасць войскаў ЗША на тэрыторыі гэтых краін, гаворыцца ў паведамленнях Міністэрстваў абароны Эстоніі і Літвы.

Трэцяя балтыйская краіна, Латвія, падпісала аналfгічнае пагадненне са Злучанымі Штатамі на мінулым тыдні, паведамляе "Радыё Свабода".

Дамоўленасці маюць палегчыць разгортванне сілаў ЗША ў гэтых краінах і дазволіць супольныя вучэнні і трэніроўкі.

«Мы зацікаўлены ў працягу прысутнасці амерыканскіх войскаў у Літве, таму што гэта складае адзін з ключавых элементаў нашай бяспекі», — сказаў міністар абароны Літвы Раймундас Каробліс.

ЗША ад 2014 году ўтрымлівае ў Літве роту сваіх вайскоўцаў для ўдзелу ў вучэннях.

Бакі імкнуліся завяршыць падпісанне пагадненняў да інаўгурацыі абранага прэзідэнта ЗША Дональда Трампа, баючыся, што калі да працы прыступіць новая адміністрацыя, то гэтае пытанне можа быць адсунутае ў самы ніз парадку дня.

Двухбаковыя пагадненні аб супрацоўніцтве ў галіне абароны рыхтуюцца з ініцыятывы ЗША. Яны вызначаюць статус вайскоўцаў ЗША і іхных сямейнікаў. У адпаведнасці з пагадненнем, ЗША атрымлівае права судзіць вайскоўцаў, якія ўчынілі злачынствы на тэрыторыі краінаў дыслакацыі, але прадугледжваюцца і выключэнні — краіны дыслакацыі могуць пераняць юрысдыкцыю ў асабліва важных для іх пытаннях. Пагадненні таксама прадугледжваюць права ЗША карыстацца пэўнымі вайсковымі аб’ектамі, якія застаюцца ўласнасцю краінаў дыслакацыі амерыканскіх вайскоўцаў.