Камітэт у абарону журналістаў заклікаў улады Беларусі вызваліць блогера Лапшына

Мінскі суд арыштаваў Лапшына на 2 месяцы. Азербайджан дамагаецца яго выдачы з той прычыны, што ён неаднаразова без узгаднення з уладамі гэтай краіны бываў у Нагорным Карабаху — з пункту гледжання Баку тэрыторыі, акупаваная Арменіяй.

Паводле Генпракуратуры Азербайджану, у Баку Лапшына чакаюць абвінавачанні ў шэрагу злачынстваў, у тым ліку ў закліках да гвалтоўнай змены канстытуцыйнага ладу і ў парушэнні дзяржаўнай мяжы. У Генпракуратуры Азербайджану кажуць, што выслалі ў Мінск дакументы на экстрадыцыю Лапшына, але ў пракуратуры Беларусі яшчэ 9 студзеня адказвалі, што такіх дакументаў не атрымлівалі.

Вядома, што Лапшын спрабаваў з'вярнуцца па дапамогу ў консульскія службы амбасадаў Расіі і Ізраілю ў Беларусі. Сяброўка Лапшына Кацярына сцвярджае, што, паводле яе звестак, гэтыя звароты да адрасатаў не дайшлі,  паведамляе "Радыё Свабода".