Анамальны холад збірае ахвяры

За апошнія два дні ў Еўропе ад пераахаладжэння загінулі больш за 20 чалавек, сярод іх нямала мігрантаў і бяздомных.

10 чалавек памерлі толькі ў Польшчы, дзе тэмпература апусцілася да мінус 14 градусаў, а ў некаторых рэгіёнах - да мінус 20 градусаў па Цэльсіі, піша «Наша Ніва».

На паўднёвым усходзе і ў цэнтральнай частцы Італіі, дзе загінулі сем чалавек, ідуць моцныя снегапады.

На поўдні Германіі ў горных раёнах тэмпература паветра звалілася да мінус 26 градусаў Цэльсія, на многіх аўтамабільных трасах краіны утварыўся моцны галалёд.

У Празе, як паведамляюць чэшскія ўлады, мінулая ноч была самай халоднай з пачатку зімы. Ахвярамі марознага надвор'я там сталі тры чалавекі.

Прынамсі трое бежанцаў з-за халадоў загінулі ў Балгарыі.

У Стамбуле выпала да 40 см снегу. У апошнія дні Турцыя апынулася ва ўладзе маразоў і снежных бур.

У Маскве ўсталяваліся анамальныя калядныя маразы, слупок тэрмометра мінулай ноччу апусціўся ніжэй за мінус 30 градусаў Цэльсія.

У Мінску сёння ноччу было 24,4 градуса, у ноч на суботу — 25, сёння днём чакаецца да мінус 18. Мароз пачне адпускаць у сярэдзіне наступнага тыдня.