Уладзіміра Кондруся прысудзілі да паўтара года "хатняй хіміі" з прымусовым лячэннем

Лячыць Кондруся будуць, бо экспертыза ўстанавіла ў яго псіхічны разлад асобы. Суд прызнаў, што абвінавачаны быў "часткова адэкватным" падчас свайго "злачынства" (маецца на ўвазе на Плошчы). Але лячэнне будзе праходзіць амбулаторна.

Кондрусь — удзельнік Плошчы-2010, якога затрымалі праз 5 гадоў і судзілі за ўдзел у масавых беспарадках. На першым пасяджэнні Кондрусь дэманстратыўна паспрабаваў ускрыць вены. На другім — адмовіўся ісці ў залу суда.

Пракурор Вольга Герасімовіч папрасіла прызнаць абвінавачанага "часткова адэкватны" і даць Уладзіміру Кондрусю 3 гады абмежавання волі без накіравання ў папраўчую ўстанову з прымусовым наглядам і лячэннем. Змякчальнымі абставінамі пракурор адзначыла псіхічнае расстройства і тое, што ад падзей на Плошчы прайшло ўжо 6 гадоў.

Суддзя Святлана Бандарэнка вынесла прысуд нават мякчэйшы, чым прасіў пракурор, паведамляе "Наша ніва".