Пракурор запатрабавала для Кондруся 3 гады абмежавання волі, прысуд агучаць у 16.00

Пракурор лічыць, што дзеянні Ўладзімера Кондруся трэба кваліфікаваць паводле 2 часткі 293 артыкулу Крымінальнага кодэксу. Але пракурор адзначае, што раней Кондрусь не прыцягваўся да крымінальнай адказнасьці, лічыць, што трэба прызнаць стан здароўя як змякчальныя віну абставіны. Яна мяркуе, што Кондруся трэба прызнаць недастаткова здольным да адбыцця пакарання і ўжыць адносна яго 70-ы артыкул — больш мяккае пакаранне. У выніку пракурор просіць для Кондруся 3 гады абмежвання волі з прымусовым наглядам і лячэннем.

Кондрусь абвінавачваецца ў тым, што 19 снежня 2010 году "далучыўся да натоўпу, які бясчынстваваў" і ўзяў удзел ў масавых беспарадках, у выніку якіх была пашкоджаная дзяржаўная маёмасць болей як на 3 тысячы рублёў, пацярпелі супрацоўнікі міліцыі. Таксама, па словах пракурора,Кондрусь спрабаваў патрапіць у Дом ураду, біў пакункам з паперай па акну, падняўся на аконны праём, біў трубой па шкле, біў кулаком па шчыце.

У судзе былі агалошаны вынікі комплекснай экспертызы, якая праводзілася пасля пачатку суду. "Кондрусь пакутуе на змешаны шызоідны разлад псіхікі. Дысгармонія асобы, пратэстная рэакцыя, няздольнасць падтрымліваць доўгатэрміновыя адносіны з людзьмі, падвышаны самааналіз, абвостранае разуменне сваіх правоў. Але памяць добрая. Адмова ад прыёму ежы і знаходжання ў судзе — рэакцыя пратэсту. Можа знаходзіцца ў судзе. Але з-за парушэння ў эмацыйнай сферы недакладна трактуе паводзіны іншых людзей. Патрэбны нагляд і лячэнне", - гаворыцца ў ёй, паведамляе "Радыё Свабода".