«Можа трэба ўводзіць крымінальную адказнасць?» — Давыдзька пракаментаваў белорусафобскія публікацыі

«Калі пішуць, што Беларусь — недадзяржава, беларусы — не нацыя, хіба гэта не мэтанакіраваная дэзінфармацыя з мэтай дэстабілізацыі дзяржавы?», — задаўся пытаннем старшыня Нацыянальнай дзяржаўнай тэлерадыёкампаніі Генадзь Давыдзька.

Ён згадаў скандальныя заявы Леаніда Рашэтнікава, які публічна заявіў аб штучнасці беларускай мовы і дзяржаўнасці, паведамляе "Радыё Свабода".

«Ну збалбатнуў нешта пенсіянер, ну паказаў сябе поўным дылетантам — ну што з таго? Балбатуноў хіба не сустракалі? А можа гэта не дакараць трэба, а ўводзіць крымінальную адказнасць?», — адзначыў ён.

Рэдактар «СБ-Беларусь сегодня» Павал Якубовіч у сваю чаргу заявіў, што крымінальную адказнасць можа ўводзіць і не варта, але ў згаданых публікацыях ён бачыць пэўную тэндэнцыю.

«Рашэтнікаў — гэта вельмі высокапастаўлены пенсіянер маскоўскі, генерал-лейтэнант нейкіх спецслужбаў. Гэты чалавек швэндаецца па сурʼёзных прыёмных. Я не думаю, што тое, што ён робіць, кладзецца на стол Пуціну або Патрушаву — гэта глупства. Але ўражанне ствараецца, што ў нейкіх уладных калідорах ён бывае і нейкія плёткі слухае. Таму заява, што беларуская мова з'явілася толькі ў 1926 годзе... Ён мабыць рэтранслюе нейкія думкі, мабыць, гэта на нейкім узроўні ў Маскве падаграваецца думка такая. Згадаем і „Регнум“ (гэта таксама не з паветра бярэцца), цяпер гэтую заяву і іншыя заявы ў расійскай благасферы».

На думку Якубовіча, падобныя публікацыі маюць адначасова і станоўчы эфект у грамадстве: «Агульная кансалідацыя адбылася — ну не трэба нас абражаць!».

Давыдзька назваў такія выказванні, якія гучаць у Расіі, «сімптаматычнымі і нават небяспечнымі».

«Калі гэта кажа выведнік, хоць і былы, які мае доступ у нейкія кабінеты, значыць ён выказвае нечы пункт гледжання. І на гэтую тэму трэба гаварыць з нашымі братамі-расіянамі, і трэба ставіць кропкі над „і“ — хлопцы, нельга так, трэба паважаць адзін аднаго!», — упэўнены ён.