Хуткі цягнік “Стрыж” пачаў курсіраваць праз Беларусь (фота, відэа)

Асаблівасць новага цягніка ў тым, што ён здольны пераходзіць з вузкакалейнай чыгункі на шырокакалейную і назад без змены вагонных цялежак, піша БЕЛТА. У 2015 годзе на станцыі “Брэст” была абсталяваная спецыяльная прылада для пропуску такіх цягнікоў тыпу Talgo. Гэта дазволіла скараціць час пераходу на іншую каляіну да 30 хвілін, калі астатнім цягнікам трэба каля 2 гадзін.

Цягнік “Стрыж” (Swift) Расійскай чыгункі будзе пераадольваць адлегласць ад Масквы да Берліна за 20 гадзін 14 хвілін. Назад ён дабярэцца да Масквы за 20 гадзін 35 хвілін. Раней на шлях трацілі 24 гадзіны 49 хвілін і 25 гадзін 56 хвілін адпаведна. “Стрыж” будзе курсіраваць 2 разы на тыдзень. З Масквы ён будзе адпраўляцца па суботах і нядзелях у 13.05 і прыбываць на станцыю Берлін Остбанхоф у 07.19 наступных сутак (па мясцовым часе). У шляху руху па Беларусі цягнік будзе рабіць тры прыпынкі: у Оршы (прыбыццё — 18.32), Мінску (прыбыццё — 20.55) і Брэсце (прыбыццё — 00.24).

З Берліна цягнік будзе адпраўляцца па нядзелях і панядзелках у 18.50 (па мясцовым часе). На зваротным шляху ў Брэст ён прыбудзе ў 05.38 наступных сутак, у Мінск — у 9.12, а ў Оршу — у 11.43. На Курскі вакзал Масквы цягнік прыбудзе ў 17.25. Больш падрабязна з раскладам руху цягніка можна азнаёміцца ў чыгуначных касах і па тэлефонах даведачных службаў, а таксама на сайце Беларускай чыгункі.