Беларуса, асуджанага за антырасійскі запіс, затрымалі на выхадзе з калоніі

 Як паведамляе “Наша Ніва” са спасылкай на расійскія рэсурсы, тэрмін зняволення беларуса заканчваўся 16 снежня.

Ён выйшаў з калоніі-пасялення пад Ніжнім Ноўгарадам і адразу быў затрыманы паліцыяй. Цяпер Сілівончыка змясцілі ў цэнтр часовага ўтрымання для замежных грамадзян.

Пазней Сормаўскі раённы суд завочна пазбавіў Сілівончыка свабоды яшчэ на тры месяцы, паколькі Мінюст Расіі абвясціў яго персонай нон-грата. Цягам трох наступных месяцаў Сілівончыка маюць дэпартаваць з Расіі. Але гэтага моманту ён будзе чакаць у міграцыйнай турме.

Напярэдадні беларуская журналістка Ірына Халіп заявіла, што Сілівончык адразу пасля вызвалення мае намер пакінуць межы Расіі. «Увосень ў ПК-14 Ніжагародскай вобласці прыйшло распараджэнне міністэрства юстыцыі Расіі за подпісам намесніка міністра Алу Алханава аб прызнанні знаходжання грамадзяніна Сілівончыка К. В. на тэрыторыі Расійскай Федэрацыі непажаданым. А гэта значыць, што ў яго пасля калоніі два варыянты, прычым выбар робіць не ён: або на цягнік па білеце, набытым  аператыўнікамі, або ў міграцыйная турма да дэпартацыі. А рашэнне аб дэпартацыі можа і зацягнуцца: на носе навагоднія святы і доўгія расійскія вакацыі», - адзначыла Халіп.

23-гадовы гамяльчанін Кірыл Сілівончык працаваў сісадмінам на ваенным заводзе ў Ніжнім Ноўгарадзе. Ён змясціў на сваёй старонцы ў сацыяльнай сетцы Вконтакте запіс з заклікам вярнуць Крым Украіне. 18 снежня 2014 года яго затрымалі на працоўным месцы і адправілі ў СІЗА. Пасля гэтага хлопец быў асуджаны да двух гадоў зняволення.