Фінансаванне Белсата могуць абрэзаць на 2/3 і перавесці канал на расейскую мову

Замест 17 мільёнаў злотых (4,2 млн даляраў) "Белсат" атрымае толькі 5 мільёнаў ($1,2 млн), "такое рашэнне рыхтуецца ў Міністэрстве замежных спраў", — пацвердзіла сайту кіраўніца канала Агнешка Рамашэўская.

"Я даведалася таксама, што мы павінны вяшчаць па-расейску, — кажа Рамашэўская. — Гэта яшчэ адзін абсурд! Беларуская мова стала нашым знакам адрознення. Без беларускай мовы мы будзем мець Расею ў Брэсце. Праз год ці праз пяць гадоў, але так ці інакш гэта будзе нявыгадна. Я не магу ўцяміць, як нехта можа гэтага не разумець… Беларусы любяць сваю мову. Наш калега — дырэктар Інстытута Польскага ў Мінску, і ён можа пацвердзіць, што за ўжыванне беларускай мовы яго там на руках носяць — нават расейскамоўныя беларусы. Такая рэальнасць. Менавіта таму рашэнне МЗС для мяне незразумелае. Я спрабую пераканаць сябе, што гэта непаразуменне. Я лічыла сябе прыхільніцай "добрых перамен" і нават не дапускала, што такое можа са мною здарыцца".

"Белсат" быў створаны ў 2008 годзе і паступова павялічваў абсяг вяшчання. Асабліва папулярным быў яго вечаровы навінны блок. У апошнія гады "Белсат" стаў заўважны таксама ў інтэрнэце, паведамляе "Наша ніва".