"Мемарыял" апублікаваў базу 40 тысяч супрацоўнікаў НКВД часоў Вялікага тэрору

База кароткіх звестак пра 39 950 супрацоўнікаў Народнага камісарыяту ўнутраных справаў СССР (НКВД) даступныы на сайце nkvd.memo.ru.

Як сцвярджае "Мемарыял", у даведнік увайшлі практычна ўсе, каму было нададзенае адмысловые званне з восені 1935 па сярэдзіну 1939 году. Галоўнай крыніцай звестак для даведніка сталі загады НКВД па асабістым складзе. У даведніку прыведзеныя нумары і даты загадаў аб прысваенні адмысловых званняў і аб звальненні з НКВД, звесткі аб займаемай на момант звальнення пасадзе, а таксама інфармацыя аб атрыманых дзяржаўных узнагародах і аб узнагароджанні знакамі "Ганаровы работнік ВЧК-ГПУ". Гэтая інфармацыя дапоўненая звесткамі з іншых крыніцаў, у тым ліку пра загінулых у час Другой усясветнай вайны і рэпрэсаваных.

Асобна можна шукаць супрацоўнікаў НКВД, якія служылі ў БССР, паведамляяе "Радыё Свабода".​

"Вялікім тэрорам" называюць перыяд найбольш масавых палітычных рэпрэсіяў у СССР. Пік рэпрэсіяў прыйшоўся на 1937-38 гады, калі з палітычных матываў былі расстраляныя без малага 700 тысяч чалавек. За адну "Чорную ноч" 29-30 кастрычніка 1937 году ў сутарэннях унутранай турмы НКУС у Мінску, так званай "амерыканкі", было расстраляна больш за 100 дзеячоў беларускай культуры.

Агулам за савецкі перыяд у розных крыніцах называюць ад 11 да 39 млн ахвяраў, у тым ліку расстраляных, вязняў ГУЛАГ, дэпартаваных, пазбаўленых правоў, памерлых з голаду і гэтак далей. Дакладную лічбу рэпрэсаваных сёння высветліць немагчыма: архівы КДБ дагэтуль закрытыя для даследнікаў.