Палякі на Гарадзеншчыне пратэстуюць супраць фільму пра «бандытаў з Арміі Краёвай»

а неадназначнасць новай кінастужкі «Беларусьфільму» яшчэ летась звярнуў увагу гарадзенскі журналіст Анджэй Пачобут. Фільм «Сляды на вадзе» здымаўся па матывах рамана палкоўніка ў адстаўцы Мікалая Ілінскага «Чужы сярод сваіх» і распавядае пра барацьбу НКВД з антыкамуністычным рухам на Гарадзеншчыне, паведамляе Белсат.

Паволе Саюзу Палякаў у Беларусі ўзнагароджаныя ў Польшчы героі Арміі Краёвай, такія, як кавалер ордэна «Virtuti Militari» маёр Ян Піўнік «Понуры» і паручнік Чэслаў Заянчкоўскі «Рагнэр» будуць прадстаўлены ў негатыўным святле. Выхад фільму плануецца ў сакавіку 2017 года і будзе прысвечаны… 100-гадовай гадавіне ўтварэння беларускай міліцыі.

Выключна адмоўны вобраз Арміі Краёвай у фільме выклікаў абурэнне палякаў Гарадзеншчыны. Кіраўніцтва непрызнанага ўладамі Звязу палякаў у Беларусі плануе звярнуцца са скаргай да польскага ўраду, каб польскі бок настойваў на забароне паказу гэтай стужкі.

«Гэта абраза для нас усіх, таму што не гаворыцца пра тое, што тыя жаўнеры АК змагаліся за сваю зямлю, засталіся вернымі словам «Бог, Гонар, Айчыны». Вельмі шмат людзей, нашыя дзяды і прадзеды былі звязаны з Арміяй Краёвай і сёння іх унукам убіваецца ў галаву, што іх продкі былі бандытамі. А не гаворыцца пра тое, што гэтыя жаўнеры ваявалі на сваіх тэрыторыях, што гэта «чужыя» прыйшлі на нашыя землі і «чужыя» забаранілі ўжываць польскую мову, польскую нацыянальнасць, масава вывозілі людзей у Сібір, забівалі ў Курапатах, дэпартавалі і трымалі ў сталінскіх лагерах. Пры гэтым будзе створаны пазітыўны культ службоўцаў НКВД, якіх прадставяць як герояў. Гэта недапушчальная фальсіфікацыя гістарычных фактаў і свядомая непрыкрытая маніпуляцыя», – каментуе сітуацыю кіраўніца непрызнанага Звязу Палякаў у Беларусі Анджэліка Борыс, якая мяркуе, што ў межах польска-беларускіх адносінаў павінна быць узнята тэрміновая дыскусія.

У бліжэйшы час распачнецца збор подпісаў у Міністэрства адукацыі Беларусі, каб забараніць паказ стужкі ў Беларусі і таксама ўвесці змены ў падручніках па гісторыі для вучняў 10-га класа, дзе Армія Краёва згадваецца выключна ў святле тэрору ў дачыненні да грамадзянаў БССР.

«Раней пра гэта мы размаўлялі з настаўнікамі польскай мовы. Мы вучым дзяцей, возім іх па месцах памяці, дзе пахаваныя жаўнеры АК, жаўнеры, загінулыя ў польска-бальшавіцкай вайне і пры абароне Горадні ў 1939-м. А нашая моладзь у сябе ў школах чытае, што тэрарысты з АК забілі столькі і столькі жыхароў БССР, што яны масава палілі і знішчалі вёскі. І па гэтых падручніках вучацца дзеці і моладзь у польскіх школах у Горадні, Ваўкавыску і іншых школах па ўсёй Беларусі. Гэта частка нашай гісторыі і нельга заставацца абыякавым у стасунку да такой фальсіфікацыі. Калі мы будзем пераказваць гэтую хлусню нашым пакаленням, то чаго мы будзем чакаць? Ці будуць яны мець пашану да нас, да палякаў, да польскага народа?» – кажа Анджэліка Борыс.