На Гомельшчыне 15 райвыканкамаў забаранілі пікеты ў абарону незалежнасці Беларусі

На наступным тыдні такія ж суды пройдуць у Добрушы і Чачэрску, паведамляе Радыё Свабода.

Пікеты ў абарону незалежнасці і суверэнітэту забаранілі Акцябрскі, Брагінскі, Буда-Кашалёўскі, Веткаўскі, Добрускі, Жлобінскі, Жыткавіцкі, Ельскі, Кармянскі, Калінкавіцкі, Лельчыцкі, Лоеўскі, Рагачоўскі, Хойніцкі, Чачэрскі райвыканкамы.

«У Буда-Кашалёве, — кажа грамадзкі актывіст Сяргей Касабуцкі, — мне адмовілі ў дазволе праводзіць пікет у абарону суверэнітэту і незалежнасці нашай краіны на той падставе, што я не заключыў дамовы з міліцыяй на ахову грамадскага парадку, з раённым шпіталем — на медычнае абслугоўванне і з камунальнікамі — на прыбіранне тэрыторыі. У Хойніках адмовілі, бо ў іх вызначана толькі адно месца для правядзення масавых акцыяў — стадыён, а я замаўляў у цэнтры гораду. Усе гэтыя забароны я і мае аднадумцы, якія замаўлялі падобныя пікеты, цяпер і абскарджваем у адпаведных судах».

Прычын адмовы на правядзенне пікетаў дзве: заяўленыя ня тыя месцы правядзення пікетаў і няма дамоваў на аплату паслугаў міліцыі, медычных установаў і камунальнікаў.Кіраўнік рэгіянальнага цэнтру стратэгічнай цяжбы, юрыст Леанід Судаленка сказаў, што ў мінулым годзе актывістам удалося абскардзіць у судзе незаконнае рашэнне Хойніцкага райвыканкаму на забарону правядзення мірнага сходу і здабыць перамогу. Аднак сёлета гэты райвыканкам зноў забараніў масавую акцыю, нягледзячы на тое, што пікет меў на мэце прыцягнуць увагу жыхароў да такіх фундаментальных асноваў дзяржавы, як суверэнітэт і незалежнасць.