Створана электронная петыцыя для подпісаў за бел-чырвона-белы сцяг

“Электронная петыцыя створана па шматлікіх просьбах прыхільнікаў бел-чырвона-белага сцяга, якія ня маюць мажлівасці падпісаць зварот фізічна, — распавядае прэс-службе "Маладога фронту" Зьміцер Дашкевіч. — Хаця асноўны націск у падпісной кампаніі мы робім на фізічныя подпісы, бо толькі такі падыход дазваляе камунікаваць з людзьмі і здабываць новых прыхільнікаў нашага сапраўднага сцяга, тым не менш электронная петыцыя таксама можа дапамагчы ў справе пашырэння ведаў пра бел-чырвона-белы сцяг. Электронная петыцыя апроч Міністэрства культуры будзе накіравана і ў Нацыянальную акадэмію навук Беларусі”.

Нагадаем, што 19 верасня, у 25-ую гадавіну дзяржаўнасці бел-чырвона-белага сцяга Зьміцер Дашкевіч распачаў кампанію па зборы подпісаў у Міністэрства культуры з тым, каб бел-чырвона-беламу сцягу быў нададзены статус нематэрыяльнай гісторыка-культурнай каштоўнасці. Кожны жадаючы можа запампаваць тэкст звароту па наступнай спасылцы padpisny-blank-za-biel-czyrvona-biely-sciah , падпісаць яго і перадаць зборшчыкам. Кожны дзень (апроч нядзелі) а 19:00 пікет на выхадзе з метро Купалаўская ў бок крамы “Цэнтральная”.