Рух салідарнасці „Разам” запрашае на акцыю памяці ў Курапаты

Рух салідарнасці „Разам” запрашае на традыцыйную акцыю ўшанавання памяці ахвяраў камунізму.

„Гэта сімвалічнае месца, дзякуючы якому пра трагедыю камуністычных рэпрэсій у Беларусі ведае увесь свет”, – заявіў «Радыё Рацыя» сябра аргкамітэту руху Вячаслаў Сіўчык.

– Гэтыя акцыі робяцца ўсё больш і больш важнымі яшчэ па той прычыне, што кожны год усё менш сведак тых камуністычных злачынстваў. Мы не можам па архівах акупантаў мець тую карціну, што адбывалася на нашай зямлі. Гэта вельмі кепска. І вельмі кепска, што ўжо навейшыя падзеі ва Усходняй Еўропе паказваюць, што калі хтосьці не асэнсаваў, што адбывалася на нашай зямлі пры панаванні камуністаў, то гэта можа быць пагроза не толькі для нас, сучаснікаў, але і для будучых пакаленняў.

Мерапрыемства адбудзецца ў традыцыйным фармаце 29-га верасня. Пачатак а 18-й гадзіне.