Атрад "Пагоня" спыніў удзел у ваенных дзеяннях

"Спыненне поўнамаштабных ваенных дзеянняў на Ўсходзе Ўкраіны прымусіла нас, беларускіх добраахвотнікаў атраду "Пагоня", перагледзець сваю ролю ў гэтай вайне. Мы прыпыняем удзел у ваенных дзеяннях і ствараем арганізацыю "Грамадзкі сектар Атраду "Пагоня", якая ў першую чаргу будзе займацца рознабаковай дапамогай беларускім добраахвотнікам", - гаворыцца ў паведамленні прэс-службы "Пагоні".

Таксама адзначаецаа, што канфлікт на Данбасе замарожваецца, бо Масква не можа ні наступаць, ні адступаць. "Новая хваля маштабнай эскалацыі малаверагодная: у Расіі няма рэсурсаў, улічваючы, што войска Ўкраіны за два гады стала нашмат больш прафесійным і здольным нанесці ворагу вялікія страты. Пры гэтым беларусы, які хацелі атрымаць баявы досвед для далейшай абароны Беларусі, яго за гэты час змаглі атрымаць", – гаворыцца ў паведамленні.

Як падкрэсьліваецца ў заяве, практычны сэнс удзелу беларусаў у вайне зменшыўся, але цяпер патрэбная дапамога беларускім добраахвотнікам, якія ваявалі на баку Ўкраіны. Таксама арганізацыя будзе займацца інфармацыйнай дзейнасцю.

"У выпадку ж, калі нашая дапамога зноў спатрэбіцца Ўкраіне, мы гатовыя ўзяць зброю ў рукі і дапамагчы братэрскаму народу", – сцвярджаюць у "Пагоні", паведамляе "Радыё Свабода".