Замест акцыі каля амбасады Расеі – блізу 30 міліцыянтаў і затрыманне

Відавочцы кажуць пра затрыманне актывісткі Вольгі Нікалайчык.

Амбасада Расеі ўся была аточаная міліцыянтамі, паведамляюць журналісты «Белсату» з месца падзеяў. Непадалёк стаяць два аўтазакі, але ёсць таксама некалькі аўтобусаў ды міліцэйскіх аўтаў, піша Белсат.

Каля амбасады міліцыянты затрымалі актывістку Вольгу Нікалайчык. Але плакат, які яна падрыхтавала, некаторы час трымалі два іншыя актывісты. На ім было напісана «Акупанты – вон!».

«Да актывістаў прыйшоў спачатку сталы мужчына нападпітку, а пазней таксама нецвярозая жанчына. Разам яны пачалі абражаць актывістаў», – паведаміла журналістка «Белсату» Таццяна Уласенка.

Прадстаўніка БХД Паўла Пракаповіча пераследавалі «ціхары», распавяла спадарыня Уласенка. Ён ускочыў у трамвай, але туды ж паспелі сесці журналісты. Магчыма, людзі ў цывільным не схапілі актывістка толькі дзякуючы журналістам, якія былі побач.

Сёння адзін з лідараў «Маладога фронту» Зміцер Дашкевіч планаваў акцыю пад амбасадай Расеі, прысвечаную Дню беларускай вайсковай славы «Атрымалі пад Воршай, атрымаеце і пад Веткай!». Самога Змітра Дашкевіча збіла і вывезла ў невядомым кірунку група з 10-15 мужчынаў.