Украіна плануе да 2020 года падпісаць з Беларуссю дамову пра мяжу

Кабінет міністраў Украіны зацвердзіў план захадаў рэалізацыі Канцэпцыі інтэграванага кіравання межамі, адпаведна да якога да 2020 года плануецца падпісаць з Беларуссю дамову пра рэжым дзяржаўнай мяжы, супрацоўніцтва і ўзаемную дапамогу ў памежных пытаннях.

Як тлумачыцца ў рашэнні ўкраінскага ўраду, такія захады абумоўленыя неабходнасцю выканання абавязацельстваў Украіны ў межах бязвізавага дыялогу з Еўрапейскім Звязам ды іншых міжнародных абавязацельстваў па забеспячэнню належнага ўзроўню бяспекі межаў.

Беларусь і Ўкраіна падпісалі дамову пра дзяржаўную мяжу 12 траўня 1997 года. У тым жа годзе яго ратыфікавала Вярхоўная Рада Ўкраіны. Нацыянальны сход Беларусі выканаў адпаведную працэдуру толькі ў 2010 годзе, і яшчэ праз тры гады пасля гэтага бакі абмяняліся ратыфікацыйнымі граматамі.

Дэмаркацыя беларуска-ўкраінскай мяжы пачалася з урачыстага адкрыцця 13 лістапада 2013 года першага памежнага знака ў месцы сыходжання дзяржаўных межаў Украіны, Беларусі і Расіі.

30 ліпеня 2014 года ў Чарнігаве ўрады Беларусі і Ўкраіны падпісалі палажэнне пра дэмаркацыю мяжы, агульная працягласць якой складае 1084,2 кіламетраў (у межах Чарнігаўскай вобласці — 227 кіламетраў).

Сёлета ў красавіку Беларусь прыпыніла працы па дэмаркацыі мяжы на Валыні з-за пратэсту мясцовых жыхароў, якія лічылі, што лінія размежавання праведзеная няправільна. Паводле Дзяржаўнай памежнай службы, праблемным участкам тады стаў Жыроўскі канал, які адпаведна дамоўленасцям належыць Беларусі. Мясцовыя жыхары выкарыстоўвалі ваду з гэтага каналу для прамывання незаконна здабытага бурштыну, паведамляе "Радыё Свабода".