Някляеў і Статкевіч праінфармавалі Мінгарвыканкам пра акцыю 12 верасня

У дакуменце гаворыцца, што акцыя пачнецца а 18-й гадзіне.

"У адпаведнасці з правам, гарантаваным артыкулам 35 Канстытуцыі Рэспублікі Беларусь і падпісанымі нашай краінай міжнароднымі пагадненнямі, мы маем намер правесці 12 верасня 2016 году на Кастрычніцкай плошчы Мінску масавую акцыю з патрабаваннем сапраўдных выбараў замест выбарчых фарсаў, якія рэгулярна арганізуе правячы рэжым", — гаворыцца ў дакуменце.

Палітыкі прапануюць уладам "выканаць патрабаванні Канстытуцыі і забяспечыць бесперашкоднае правядзенне акцыі". "У Беларусі адсутнічае законна абраны парламент і, адпаведна, легітымная працэдура рэалізацыі канстытуцыйнага права на свабоду мітынгаў і дэманстрацый. Таму, у адпаведнасці з прынятай у суседніх краінах практыкай, паведамляем пра свой намер правесці 12 верасня масавую акцыю за 5 дзён да яе пачатку", — гаворыцца ў дакуменце, паведамляе "Радыё Свабода".