Міліцыя спыніла маладафронтаўцаў, якія капалі акопы пад мяжой з Расіяй

Праз некалькі хвілін пасля пачатку акцыі з'явілася група леснікоў, да іх далучыліся невядомыя людзі ў цывільным. Неўзабаве прыехалі дзве машыны з узброенымі супрацоўнікамі міліцыі ў бронекамізэльках, таксама з'явіліся пажарнікі.

Міліцыя склала пратаколы на ўдзельнікаў акцыі: адзін за "парушэнне цэласнасці подсцілу і жывога надглебавага покрыва", другі за неадпаведнасць нормам аптэчкі ў машыне актывістаў. Актывісты затрыманыя да высвятлення абставінаў: кіраўнік раёну выклікаў аператыўную групу, бо ў машыне аднаго з удзельнікаў акцыі, лідэра "Маладога фронту" Змітра Дашкевіча знайшлі страйкбольны аўтамат — ідзе праверка муляжу.

Акцыя "Маладога фронту" звязаная з агрэсіяй Расіі адносна Ўкраіны: на думку яе ўдзельнікаў, беларусам таксама трэба быць гатовымі да адпору расійскай агрэсіі. За 76 км ад месца правядзення акцыі знаходзіцца расійскае мястэчка Клінцы, куды з нядаўняга часу сцягваюцца расійскія войскі, паведамляе "Радыё Свабода".