Беларусы стварылі ва Ўкраіне Беларускую вайсковую раду

З'езд прадстаўнікоў беларускіх добраахвотнікаў, якія прыехалі з зоны АТА ў Чарнігаў, да яго завяршэння не меў шырокай агалоскі. Толькі 14 жніўня трое сустаршыняў рады правялі прэс-канферэнцыю і агучылі вынікі свайго ўстаноўчага сходу.

Сяржук Багукалец, этнічны беларус, які стала жыве ва Ўкраіне, сказаў журналістам, што на з'ездзе прысутнічалі беларусы, якія ваююць поплеч з украінцамі ў Данецкай і Луганскай абласцях ва Ўзброеных сілах Украіны, Нацыянальнай гвардыі, добраахвотных батальёнах ды іншых вайсковых фармаваннях. Яны абралі Беларускую вайсковую раду, якую даручылі ачольваць пяці сустаршыням.

"Рада мае на мэце згуртаваць беларусаў, якія дапамагаюць барацьбе ўкраінскага народу з расійскімі акупантамі, аказваць узаемадапамогу самім беларусам і тым, хто лічыць сябе беларусамі. Так сталася, што за два гады вайны беларусы аказаліся раскіданымі па розных вайсковых фармаваннях. У перспектыве мы маем на мэце стварыць вайсковую частку, якая будзе ўкамплектаваная беларусамі", — расказаў Багукалец.

Форум вайскоўцаў беларускага паходжаньня прыняў статут, абмеркаваў парадак прыёму ў арганізацыю.

"Маючы на ўвазе працяг працэсу зьнішчэньня беларускай нацыянальнай дзяржавы, распальваньне Расейскай Фэдэрацыяй братазабойчай вайны на ўсходзе Ўкраіны; разумеючы, што барацьба за свабоду Ўкраіны ёсьць і барацьбой за вольную і незалежную Беларусь; зыходзячы зь неабходнасьці барацьбы супраць агульнага ворага, які нясе пагрозу ня толькі нашым народам, але і ўсяму цывілізаванаму сьвету, мы, беларускія ваяры, абвяшчаем пра стварэньне Беларускай вайсковай рады. Жыве Беларусь! Слава Ўкраіне!", - гаворыцца ў маніфесце, паведамляе "Радыё Свабода".